Иван Ярыгин аатынан XXVIII турнир иккис күнүгэр эр дьон 61, 86 уонна 125 кг ыйааһыннарга киирсэллэр. Онуоха Саха сириттэн 61 киилэҕэ эрэ кыттааччылардаахпыт. Бу ыйааһыҥҥа барыта 38 бөҕөс күөн көрсөр.
Сэрэбиэй быһыытынан үөһээ бөлөххө Виктор Рассадин бурят Даша Шарастепановтыын, Револий Самсонов – Алексей Медведевтиин (Хакасия), Белоруссия чиэһин көмүскүүр Андрей Бекренев монгол Немехбаяр Батсайханныын уонна Егор Пономарев бэйэтин хамаандатын киһитэ Николай Охлопковтыын тустар буолбуттар.
Өскөтүн барыта санаа хоту буоллаҕына, Рассадин финал чиэппэригэр, ол аата үһүс эргииргэ аан дойду чөмпүйэнээтин “буруолуу сылдьар” боруонса призера Ахмед Чакаевтыын көрсүөн сөп. Киһи быһа этэн кэбиһиэн баҕарбат, ол гынан баран, табылыннаҕына, финалга тахсар иһин киирсиигэ Виктор Рассадин уонна Егор Пономарев көрсүөхтэрин сөп курдук балаһыанньа эмиэ баар. Чэ, ити баҕа санаа курдук, көбүөр көрдөрүө…
Бу бөлөххө бырахсыылааҕынан биллибит тувинец Начын Куулар үчүгэй таһымыгар сылдьар буоллаҕына, буккууру таһаарыан сөп.
Оттон иккис бөлөххө биһиэннэриттэн Вячеслав Ефремов бурят Булат Батоевтыын, Ньургун Скрябин москвич Осман Джугелиялыын, Айхан Антонов – Руслан Жендаевтыын (Красноярскай), Дьулустан Булатов дагестанец Рамазбек Жамаловтыын күөн көрсөллөр. Жамалов ааспыт күһүн Хасавюрка ыытыллыбыт Континеннар икки ардыларынааҕы турнирга финалга казах Д.Ниязбековы хоппутун санатар тоҕоостоох дии саныыбын. Кинини чаҕылхай талаан тахсан эрэр диэн кэпсииллэр.
Өскөтүн Ефремов уонна Скрябин бастакы эргииргэ кыайыыны ситистэхтэринэ, иккискэ – бэйэлэрин утары көрсүөхтэрин сөп. Антоновтаах Булатов эмиэ.
Бу ыйааһын күүстээхтэрэ олимпийскай призер дьоппуон Рие Хигучи бастакы эргииргэ Европа чөмпүйүөнэ, дагестанец Гаджимурад Рашидовтыын тустар. Манна сыһыары тутан эттэххэ, 2014 сыллаахха бу бөҕөстөр эдэрдэргэ аан дойду күрэхтэһиитигэр сирэй көрсөн тураллар. Онно Рашидов дьоппуону 10:0 ахсаанынан баһыйан, боруонса мэтээлинэн наҕараадаламмыта. Интэриэһинэйэ баар, ити күрэхтэһиигэ бастаабыт иранец Иман Садеги Красноярскайдааҕы турнирга 65 киилэҕэ кыттар.
Өссө бу бөлөххө аан дойду экс-чөмпүйүөнэ Бекхан Гойгереев, Муршид Муталимов, Баяр Цыренов курдук күүстээх бөҕөстөр бааллар.
Бастакы күн 57 кг билгэлээбитим быһыытынан, Артем Гебеков финалга тахсыбыта. Оттон иккис бөлөхтөн “Угуев, Тускаев, эбэтэр Григорьев финалга тахсыахтарын сөп” диэбитим ханныктык эмэтик сөп түбэстэ. Финалга Угуев Гебековы олох киһилээбэтэ, 10:0 ахсаанынан күппүлүү ыытта.
Син ити курдук, бу сырыыга 61 киилэҕэ Виктор Рассадин, эбэтэр Егор Пономарев финалга тахсыахтарын сөп диэн тойоннуубун. Оттон аллараа бөлөхтөн финалга Гаджимурад Рашидов тахсыан сөп дии саныыбын. Дьэ, төһөтө туоларын дуу, туолбатын дуу – турнир түмүгүн кытта тэҥнээн көрүөхпүт.
PS: Турнир хаамыытыгар туох эмэ өйдөммөт түгэннээх, эбэтэр ыйытыылаах буоллаххытына, бу суруйуу аннынан бэриллэр “Санаа атастаһыытыгар” кыттыһыаххытын сөп. Онно син эмиэ бэҕэһээҥҥи курдук, саха бөҕөстөрүн тустууларын тутатына сырдатан иһиэхпит.
Петр ПАВЛОВ, “Саха сирэ”, http//edersaas.ru