Бүтүн Арассыыйатааҕы “Кубок Никифорова-Денисова” турнирга уолаттарбыт кыттыахтара
Ахсынньы 2-8 күннэригэр Санкт-Петербург куоракка буоксаҕа оҕолорго уонна юниордарга биир үрдүк таһымнаах AIBA Бочуоттаах бэрэсидьиэнин сырдык кэриэһигэр аналлаах Бүтүн Арассыыйатааҕы “Кубок Никифорова-Денисова” турнир ыытыллар.
Бу күрэхтэһиигэ дойдубут 16-17 саастаах бастыҥ боксердара күөн көрсөн, бастыҥ аатын былдьаһыахтара. “Кубок Никифорова-Денисова” турнир чөмпүйүөннэрэ юниордарга бастыҥ боксер аатын сүгүөхтэрэ. Былырыыҥҥы икки кыайыылаах эдэрдэргэ аан дойду чөмпүйүөнэ буолбуттара уонна биир кыайыылаах Аргентинаҕа ыытыллыбыт юниордар олимпиадаларыгар кыайбыта элбэҕи этэр.
Саха сириттэн 49 киилэҕэ диэри ыйааһыҥҥа Мэҥэ Хаҥаластан Евгений Мартынов уонна 75 киилэҕэ диэри ыйааһыҥҥа Өрөспүүбүлүкэтээҕи оҕо анал спортивнай оскуолатын иитиллээччитэ, “Юность России” первенство кыайыылааҕа Назар Андреев кыттыахтара.
Николай Попов, «Саха сирэ» хаһыат, edersaas.ru