Красноярскайга, норуоттар икки ардыларынааҕы Гран-при турнир кэмигэр икки төгүллээх олимпийскай чөмпүйүөн Иван Ярыгин спорка олоҕун, ситиһиилэрин көрдөрөр көһө сылдьар мусуой экспозицията аһыллан үлэлээтэ. Экспозиция сүрүннээн турнир историятын кэрэһилиир.
Петр ПАВЛОВ, «Саха сирэ» хаһыат, edersaas.ru
— Бу быыстапка Красноярскай спордун туһунан кэпсиир, — диир мусуой салайааччыта, Иван Ярыгин бииргэ төрөөбүт балта Любовь Акулич. — Иван Ярыгин аатынан мусуойдар Сизая сэлиэнньэҕэ уонна Красноярскай куоракка бааллар. Эһиги болҕомтоҕутугар көһөрүллэ сылдьар быыстапка. Биһиги сүүрбэччэ сыл мусуой матырыйаалларын, экспонаттарын хомуйабыт. Саамай сөбүлүүр экспонаттарбытынан Иван тутта сылдьыбыт маллара: спортивнай көстүүмэ, халыҥ куурката буолаллар.
Манна баҕалаах барыта красноярецтар олимпийскай чөмпүйүөннэрин кыһыл көмүс мэтээллэрин, Олимпиада, аан дойду, Европа чөмпүйэнээттэрин атрибуттарын, сэдэх хаартыскалары, Иван Ярыгин скульптуратын сөҕө-махтайа, астына көрдүлэр. Өйдөбүнньүк хаартыскаҕа түстүлэр.
Мусуой экспозициятын көрөөччүлэргэ тэрийээччилэр Иван Ярыгин олоҕор сыһыаннаах викторина ыыттылар. Холобур, Иван Сергеевич дьиэ кэргэҥҥэ хаһыс оҕо этэй? Хас сыллаахха турнир Гран-при аатын ылбытай? Уонна да атын ыйытыылар бэрилиннилэр. Кыайыылаахтар турнирга ананан оҥоһуллубут футболкаларынан, ручкаларынан, вымпелларынан, о.д.а. бэлиэтэннилэр. Кинилэргэ бириистэри номоххо киирбит бөҕөс Александр Карелин туттартаата.
Маны тэҥэ турнир кэмигэр Красноярскай кыраай спорка министиэристибэтин уонна Россия Почтата Красноярскайдааҕы филиалын көҕүлээһиннэринэн Россия ханнык баҕарар муннугар Иван Ярыгин мэтириэттээх открытка ыытыыта тэрилиннэ. Өссө биир ый устата Красноярскай оскуолаларыгар Иван Ярыгиҥҥа аналлаах аһаҕас уруоктар ыытыллыбыттар.
Маннык дьаһаллары биһиги эмиэ тэрийиэхпитин сөп. Холобур, сотору олимпийскай чөмпүйүөн Роман Дмитриев кэриэһигэр норуоттар икки ардыларынааҕы турнир ыытыллыаҕа. Онно “Триумфка” анал миэстэ булан көһө сылдьар быыстапка тэриллиэн, оскуолаларга аһаҕас уруоктар ыытыллыахтарын, онно викториналар буолуохтарын сөп. Ону эһиги туох дии саныыгыт? Манна сүрүн көҕүлээһини Роман Дмитриев аатынан Олимпийскай эрэл училищета ылыахтаах.
Петр ПАВЛОВ, “Саха сирэ”, http//edersaas.ru