Ил Дархан Айсен Николаев туризм сайдыытыгар Саха сирэ Арассыыйа биир саамай киэн туттар сиринэн буолар кыахтааҕын бэлиэтээтэ.
—-Билигин туризм салаатыгар уустук кэмнэр буолан тураллар. Урбаанньыттарга өйөбүллэр оҥоһуллубуттарын да иһин, хоруона хамсыгын кэнниттэн атахха турарга, саҥа таһымҥа тахсарга, бу тиийбэт. Буолан баран, өрөспүүбүлүкэҕэ туризм сайдарыгар дьоһуннаах стимул оннук оҥоһулла илик, — диэтэ кини.
Ил Дархан кэлэр сылтан туризмҥа уонна ыалдьытымсах быһыыны көрдөрөргө «Туризм и индустрия гостеприимства» диэн национальнай бырайыак былааннанарын иһитиннэрдэ. Маныаха Саха сирэ Арассыыйа биир саамай киэн туттар сиринэн буолар кыахтааҕын ыйда. Кини бу улахан соругу быһаарарга бары сэргиир, сэҥээрэр салаалары, урбаанньыттары, энтузиастары кыттыһыннарар, түмэр наадатын эттэ. Оччоҕуна аныгы туристскай инфраструктураны тэрийэр, каадырдары бэлэмниир кыах улаатан, Саха сирэ туризмынан аан дойду киэҥ киэлитигэр тахсарыгар аартык арыллар кыахтааҕын бэлиэтээтэ.
Хаартыска: Ykt.Ru ылылынна