2018 с. тохсунньу 1 күнүттэн 2022 с. ахсынньы 31 күнүгэр диэри Уһук Илин эрэгийиэҥҥэ туризмынан дьарыктанааччылар нолуоктарын кээмэйэ 0% тэҥнэстэ. Бу туһунан уурааҕы РФ Бырабыыталыстыбатын бэрэссэдээтэлэ Дмитрий Медведев бэс ыйын 18 күнүгэр баттаата.
edersaas.ru
Киллэрэр дохуоттарыттан нолуок төлүүртэн босхолоннулар: быстах кэмҥэ дьону түһэрэр гостиницалар, кемпиннэр, айанньыттары олордор автофургоннар, рестораннар, аһы аадырыска тиэрдэр өҥөнөн дьарыктанааччылар, экскурсионнар уонна туристическай өҥөнү оҥорооччулар, санаторно-курортнай тэрилтэлэр, музейдар, ботаническай саадтар, зоопаркалар, национальнай пааркалар, судаарыстыбаннай заповедниктар, булт-алт, балыктааһын заповедниктара, хайаҕа тахсарга дьону сирдээччилэр, кинилэри аралдьытар, сынньатар өҥөнү оҥорооччулар, ону таһынан, сөтүөнү тэрийии, онно анал оборудование проката, айанньыттары фуникулерунан, канатнай суолунан, подъемнигынан таһыы.
Көстөрүн курдук, кэлэр түөрт сылга туризм эйгэтигэр урбаанынан дьарыктанааччыларга күөх уот умайан, бэйэ дьыалатын саҕалыырга, салгыы сайыннарарга көмүс түгэн тосхойдо.
Уһук Илин туризмы сайыннарарга судаарыстыба тоҕоостоох усулуобуйа тэрийэн, бу диэки кэлэр айанньыт ахсаанын элбэтэргэ сыал-сорук туруорар. Ол курдук, былырыыҥҥаттан омук гражданнарыгар электроннай виза биэрэр ситим үлэлээтэ. Маннык визанан номнуо 14 омук сириттэн 11 000 айанньыттар туһаннылар. Кинилэр истэриттэн Арассыыйа Уһук Илин сиригэр кытай уонна дьоппуон дьоно ордук сөбүлээн сылдьаллара бэлиэтэммит. Маны сэргэ, Сингапур, Индия, Суадовскай Аравия, Турция, Алжир, Иран, ОАЭ, Кувейт, Марокко айанньыттара интэриэһиргээн кэлэн көрөн-истэн барбыттар. Онон, ырааҕынан аймахтарбыт, илиҥҥи омуктар биһиги диэки тардыылаахтар. Үрдүк сервискэ үөрэммит Европа олохтоохторо улаханнык бу хайысханы сэргии иликтэр.
Марианна Тыртыкова, «Саха сирэ», edersaas.ru