Туризм. Алта бырайыагы сайыннарыахтара

Ааптар: Эдэр Саас

Бөлөххө киир:

Саха сирин арҕаа уонна соҕуруу өттүгэр алта туристическай бырайыагы сайыннарыахтара.

Балаҕан ыйын 16-19 күннэригэр ыытыллыбыт Саха сирин предпринимателлэрин пуорумун сиэссийэтигэр туризмы сайыннарыы кэскилин туһунан дьүүллэстилэр. Туризмы сайыннарарга ордук табыгастаах сирдэринэн Саха сирин арҕаа уонна соҕуруу өттүлэрэ ааттаннылар. Маныаха Мииринэйтэн уонна Нерюнгриттэн Арассыыйа куораттарыгар салгын аалынан быһаччы көтөр кыах баара учуоттанна.

—Туризм салаата, бу өрөспүүбүлүкэ экэниэмикэтэ сайдарыгар биир инники кэскиллээх хайысханан буолар. Саха сирэ ураты кэрэ айылҕалаах. Өймөкөөнү, Дьааҥыны сэргэ, Арктика атын оройуоннара, Саха сирин арҕаа, соҕуруу өттө барыта уратыларынан болҕомтону тардаллар. Кылаабынайа, аныгы инфраструктура уонна туристар сынньаналларыгар табыгастаах тупсаҕай усулуобуйа тэриллиэн наада. Бу хайысхаҕа үлэ саҕаламмытын көрөбүт, — диэн этэр СӨ Ил Дархана Айсен Николаев.

Предпринимателлэр пуорумнарыгар эспиэртэргэ алта туристическай бырайыагы билиһиннэрдилэр. Бу глэмпинг-паарка, «Сила духа» дьиэ кэргэн сынньанар баазата, Нерюнгригэ «Нахот» сынньалаҥ баазата, Мииринэйгэ турбааза, Ленскэй оройуонугар туристар сынньанар сирдэрэ, «Ралли рейд «Алмазы Заполярья» «Мииринэй-Удачнай-Өлөөн» маршрутунан. «Нахот» сынньалаҥ баазатын саҥардан оҥороллор, кэҥэтэллэр. «Чуоналыыры» (Мииринэй) сылы эргиччи үлэлэтэр былааннаахтар.

Тэрээһин кыттыылаахтара Мииринэйгэ, Ленскэйгэ, Ньурбаҕа, Сунтаарга, Нерюнгригэ, Алдаҥҥа туризмы сайыннарыы боппуруостарын көрдүлэр. Саха сиригэр туризмы сайыннарыы ааҕыныстыбатын бэрэстэбиитэллэрэ туристар кэлиилэрин тэрийиигэ үлэни-хамнаһы, саҥа туристическай маршруттары оҥоруу үлэлэри билиһиннэрдилэр.

«Алмазный край» телеханаал хаартыскаҕа түһэриитэ,

Мииринэй.