Бу туһунан Ил Дархан Айсен Николаев Москваҕа буолбут пресс-кэмпириэнсийэҕэ эттэ. «Экэниэмикэ биир тутаах салаатын туризмы сайыннарыах тустаахпыт. 2020 сылга Дьокуускай, Нерюнгри, Мииринэй аэропортарын саҥардыы үлэтэ бүтэн, үрдүк кылаастаах улахан сөмөлүөттэр түһэр буоллахтарына, аан дойду туризмын ырыынагар тахсар кыахтаныахпыт», — диэтэ.
Өрөспүүбүлүкэҕэ ыытыллар бырайыактар, холобура, “Кыһын Саха сириттэн саҕаланар” бэстибээл, сайыны көрсөр Ыһыах бырааһынньыга аан дойдуга биллэр, элбэх ыалдьыттаах тэрээһиннэринэн буоллулар диэн Ил Дархан кэпсээтэ:
— Саха сиригэр элбэх турист кэлиитэ тырааныспар инфраструктуратыттан тулуктаах. Сылы төгүрүччү суол суоҕа, эрэгийиэн иһигэр авиабилиэт сыаната үрдүгэ, улуустарга уонна киин куоракка гостиница сиэрбиһэ ситэри сайда илигэ туризм үлэтигэр мэһэйдэри үөскэтэллэр. Тас дойдулартан сүүһүнэн тыһыынча турист ыалдьыттыырыгар тахса сатыахпыт. Арассыыйа туристарыгар куруук ааммыт аһаҕас.
Өрөспүүбүлүкэ иһигэр туризм сайыннаҕына үлэ миэстэтэ да тахсыа, суол-иис оноһуллуо, социальнай эбийиэктэр тутуллуо этилэр. Ону сэргэ, ураты айылҕабыт кэрэ миэстэлэрэ судаарыстыба өттүттэн көрүллүө, харыстаныа этилэр.
Ньургуйаана Иванова, «Саха сирэ» хаһыат, edersaas.ru
Хаартыска СИА саайтыттан.