Атырдьах ыйын 4-7 күннэригэр Москваҕа ВДНХ-ҕа «Айаннаа!» (“Путешествуй!”) дойду таһымнаах туристическай пуорумҥа киин эригийиэннэргэ Арктика сонун туристическай маршруттарын билиһиннэрии буолуоҕа.
Тэрийээччилэр — Росконгресс, туризм федеральнай ааҕыныстыбата уонна ВДНХ. Дьыалабыай бырагыраама чэрчитинэн тэриллибит «Дойдуттан тэйбэккэ уратытык сынньаныы» тиэмэлээх биир сүрүн былаһаакка үгүс киһини интэриэһиргэтиэҕэ. Манна туристскай индустрия бэрэстэбиитэллэрэ, блогердар уонна айанньыттар туризм тирээн турар боппуруостарын уонна сонун сүүрээннэри дьүүллэһиэхтэрэ. Сиэссийэ модератора — «Бу мин дойдум» диэн айан ыйынньыгын продюсера, «Арассыыйа — кыахтаах дойду» АНО «Айан суолтата» быраҥырааматын сайдыыга уонна аналитикаҕа салайааччыта Сергей Сулейков. Эспиэрдэр саастааптарыгар мультмедиа Russia Beyond салаатын салайааччыта Юлия Акимова, суруйааччы, айанньыт, «Брянскай ойуура» заповедник бастакы дириэктэрэ Игорь Шпиленок, “Абрау-Дюрсо” туризм киинин генеральнай дириэктэрэ Денис Заболотнай уонна Мурманскай уобалас туризмҥа маркетинын салайааччытын солбуйааччы Денис Мальцев бааллар.
Пуорум дьыалабыай бырагырааматын таһынан, манна дьиэ-массыынанан дойду устун айанныыр туристар массыыналарын быыстапката дьон болҕомтотун уонна интэриэһин тардыаҕа. Биллэн турар, уопут атастаһыытын «ийэтэ-аҕата» манна баар буолуоҕа.
Арассыыйатааҕы пуорумҥа Санкт-Петербург, Пермь, Новгород, Туула, Владимирскай, Псков, Мурманскай, Оренбург, Воронеж уобаластара, Краснодар кыраайа уонна Коми Өрөспүүбүлүкэтэ бэйэлэрин кыахтарын көрдөрүөхтэрэ. Онон дойдуга оҥоһуллар бородууксуйа туризм эйгэтигэр бу олус туһалаах уонна суолталаах тэрээһинэ үгүс эрэгийиэннэр олохтоохторун түмүөҕэ.
Елена ПОТОЦКАЯ, «Саха сирэ» хаһыат.