Уоппуска кэмэ саҕаланан, үгүс дьон “ханна сынньаныахха?” диэн толкуйга сылдьар кэмэ.
Арассыыйаҕа урут уруккуттан дьон ордук Краснодарскай кыраайга уонна Крымҥа талаһар эбит буоллаҕына, кэлиҥҥи сылларга Саха сирэ курдук экзотикалаах сири үгүс турист талар буолла. 2017 сыл тохсунньутуттан омук дойдутун бородууксуйатын оннугар (импортозамещение) оҥоһуллубут бырагыраамаҕа Саха сириттэн икки туристическай тур – “Ыалдьытымсах Саха сирэ. Саха Саҥа дьыла – Ыһыах” («Гостеприимная Якутия. Праздник Ысыах — якутский Новый год) уонна “Дьикти ураты Саха сирэ” (“Удивительная Якутия”) киирбиттэрэ. Бу туурдарга путевкалары туризм эйгэтигэр дойду биллэр туроператордара тарҕаталлар.
“Дьикти ураты Саха сирэ” туур биэс күҥҥэ толкуйдаммыт. Онно Дьокуускай куорат мусуойдарын кытта билсиһии, “Өлүөнэ очуостара” Айылҕа пааркатыгар сылдьыы, куорат бэлиэ сирдэрин көрүү-истии киирэр.
“Ыалдьытымсах Саха сирэ. Саха Саҥа дьыла – Ыһыах” туристическай туур алта күннээх. Манна эмиэ “Өлүөнэ очуостара” Айылҕа пааркатыгар сылдьыы киирсэр. Үс Хатыҥҥа Туймаада Ыһыаҕын көрүү, ону тэҥэ “Саха сирин күндү таастара” («Сокровищница Якутии») уонна Хомус түмэллэрин кытта билсиһии, Өлүөнэ өрүс устун устуу киирэр.
СӨ предпринимательство, эргиэн уонна туризм миниистирин солбуйааччы Максим Прокопьев бэлиэтээбитинэн, туроператордар Биир кэлим федеральнай реестрдэрин чахчытыгар олоҕуран, өрөспүүбүлүкэ сиригэр-уотугар 26 туроператор үлэлиир (2020 сыллаахха 19 этэ). Бүгүҥҥү күҥҥэ туроператордар 287 туристическай тэрээһини оҥороллор.
Елена ПОТОЦКАЯ, “Саха сирэ” хаһыат.