Урукку сылларга тэҥнээтэххэ, кыһыҥҥы туризм үбүлүөйдээх бэстибээлигэр сүрүннээн өрөспүүбүлүкэ уонна Арассыыйа туристара анаан оҥостон-тэринэн кэлэллэрэ.
Холобура, Арассыыйа Норуоттарын ассамлеятын ыччат салаатын салайааччыта Дина Громатикополо Саха сиригэр норуоттары сомоҕолуур тэрээһиннэргэ бу иннинэ кэлэ сылдьыбыт. Өймөкөөн улууһугар сылдьан, кини «Арассыыйа эригийиэннэрин 1985 сыллааҕы выпускниктара» уопсастыбаннай түмсүү туристарын кытта көрсөн, уопсай тылы була оҕуста. Дина сахалыы сиэри-туому тутуһан, Тымныы оҕуһун искибиэригэр алаадьы ууран, сир-уоту аһатан, үгүс киһини соһутта. «Ханна да сырыттарбын, ол сирим үгэһин, сиэрин-туомун ытыктыыбын», — диир Дина Громатикополо.
Санкт Петербургтан сылдьар Петр Иванов кэргэнин уонна доҕорун кытта 154 дойдуну кэрийбит. Кини сылдьыбыт сиригэр массыынаны арендаҕа уларсан баран, кими да кэтэспэккэ-көрдөспөккө бэйэтэ бэйэтигэр холкутук айанныырын ордорор эбит. «Дьокуускайтан арендаҕа массыынаны бэрт нэһиилэ арендаҕа буллубут. Уларсыан баҕалаах суох эбит», — диир Петр.
Виктория Ларионова киин куоракка фитнесс-тренердиир эбит. Бэстибээлгэ кини бэйэтин наартанан ойууга холонон көрдө.
Воронеж куорат олохтооҕо Александр Пономарев кэргэнинээн кыһыҥҥы Байкаалы көрө кэлбиттэр. Уонна «чугаһаабычча, Тымныы полюһун көрөн кэлиэххэ!» диэн быһаарыы ылыммыттар. Кинилэр гостиницаҕа олох наадыйбаттар эбит. Массыыналарыгар хоно-аһыы сылдьаллар эбит.
Ити курдук, араас хайысханан Тымныы полюһун 20 сыллаах үбүлүөйүгэр ыалдьыттыы кэлээччи үгүс.
Елена ПОТОЦКАЯ, «Саха сирэ» хаһыат, edersaas.ru