Дьиэҕиттэн түннүккүн саппакка таҕыстаххына, бэйэтэ сабыллар, турба тэһиннэҕинэ, хаһаайын кэлиэн иннинэ уу тута арахсан хаалар. Итинник «өйдөөх дьиэ» сотору кэминэн биһиги олохпутугар баар буолуо диэн этэллэр. Аны, хааныҥ баттааһына үрдээри, хааныҥ хойдоору гыннаҕына, сэрэтэр. Дьэ, маннык сиргэ уһаайба ылар бырааптааххын, оҕоҕун бу уһуйааҥҥа суруттарыаххын сөп диэн эрдэттэн этэр анал сыһыарыы смартфоннарга киириэн сөп.
edersaas.ru
Итинник цифровой экономика олох бары салааларыгар хайдах өтөн киириэн сөбүн бырайыак оҥорор бөлөх уопсастыбаннаһы уонна бизнес бэрэстэбиитэллэрин кытта бэс ыйын 27 күнүгэр санаа атастаһыытын быһыытынан дьүүллэстэ. Инновационнай менеджмент үрдүкү оскуолатыгар мустубут дьон санаата, кинилэр кэскиллээх этиилэрэ бары түмүллэн, «СӨ цифровой экономиката» диэн региональнай бырайыакка киириэҕэ.
СӨ Инвестиционнай сайдыыга уонна урбааҥҥа миниистирин солбуйааччы Максим Прокопьев: «Цифровой экономикаҕа көһөргө Арассыыйа үрдүнэн региональнай хамаандалар оҥоһуллубуттара, ол иһигэр биһиги баарбыт. Ол аата, киһи төрүөҕүттэн хас биирдии хаамыыта барыта электроннай көрүҥҥэ көһөн, туох судаарыстыбаннай өҥөнөн туһаныахтааҕа смартфонугар кэлиэн сөп. Аныгы түргэн тэтимнээх үйэҕэ дьон бириэмэтин кэмчилээн, олоҕун чэпчэтэргэ ити оҥоһуллар. Кэккэ идэлэри IT технология солбуйуо, сир баайын хостуурга робот техника үлэлээн, дьон эчэйиитэ тохтуо. Холобур, тыа хаһаайыстыбатыгар ынах ханна барбытын, туга ыалдьыбытын, хаһан тугу аһыахтааҕын биллэрэр тэрил бааһынай хаһаайыстыбаларга туһата улахан буолуо».
Бастаан омос иһиттэххэ, фантастика курдук эрээри, аҕыйах сыллааҕыта мобильнай бааннар, online-төлөбүрдэр суох этилэр. Аныгы цифровой экономика сайдан, киһи үөйбэтэх өттүттэн өссө саҥаттан саҥа өҥөлөр тахсан, олохпутун тупсаран иһиэхтэрэ. Киинэҕэ көстөр курдук, капсула иһигэр киирэн доруобуйаҥ туругун барытын сканируйдаан, онно туох мөлтөөбүтүн-ахсаабытын билэн, тута чөлүгэр түһэрэн, эмтээн истэхтэринэ, уһун үйэлэнии элбиэ турдаҕа.
Марианна ТЫРТЫКОВА, «Саха сирэ» хаһыат, edersaas.ru