Дьону сирэйэ-хараҕа суох албыннаабыт 35 саастаах дьахтарга суут уурааҕа тахсыбытын туһунан СӨ Борокуратууратын пресс-сулууспата иһитиннэрэр.
Суут быһаарбытынан, бу дьахтар туристическай агентство салайааччыта буолан, 2018 сыллаахха Вьетнам, Доминикана, Таиланд, Кытай дойдуларыгар дьоҥҥо путевка атыылаабыт.
Онтон төлөөбүттэрин кэнниттэн кинилэргэ сымыйа докумуоннары — электроннай авиабилиэттэри, маршрут квитанцияларын, страховой полистары уонна ваучердары — биэртэлээбит.
Бу атыыласпыт дьон албыҥҥа түбэспиттэрин аэропорка көтөөрү туран эрэ билбиттэр. Ол иһигэр, Москва куораттан көтөөччүлэр эмиэ бааллар.
Түөкүн дьахтар уопсайа 1 мөлүйүөнтэн тахса суумалаах хоромньуну таһаарбыт, итинтэн сороҕун төлөөбүт.
Суут мунньаҕар албын-түөкэй дьахтар буруйун толору билиммит.
Суут кинини РФ Холуобунай кодексатын 159-с ыст. 2-3-с чаастарынан, ол эбэтэр, дьоҥҥо бөдөҥ кээмэйдээх хоромньуну оҥорон туран түөкүннээһиҥҥэ буруйдааҕынан билинэн, 4 сылга көҥүлүн быһары усулуобунайынан аахсан, 3 сылга тургутар болдьоххо уурбут.
Маны сэргэ, кини сокуоннайа суох дьайыыларыттан эмсэҕэлээбит дьоҥҥо 1.117.188 солкуобай суумалаах моральнай уонна материальнай хоромньуларын төлүөхтээх.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Санатар буоллахха, бу саас эмиэ биир турагентство салайааччыта дьахтарга суут бириигэбэрэ тахсыбыта. Түөкүн дьахтар 2015 сыл сэтинньи-ахсынньы ыйдарыгар «Норд Винд» диэн ааттаах туристическай агентство дириэктэрэбин диэн, дьону кытта дуогабар түһэрсибитэ — Филиппиныга уонна Таилаҥҥа уопсайа 998.009 солк. суумалаах путевкалары атыылаабыта.
Дьонтон харчыларын ылан баран, ону барытын бэйэтин тус наадатыгар туттубута. Путевката да, харчыта да суох хаалбыт, албыннаппыт дьону кытта быһаарсартан, көрсүһэртэн куотунан, агентствотын үлэтин тохтоппута.
Суут кинини РФ Холуобунай кодексатын 160-с ыст. 2-с, 3-с чаастарынан, ол эбэтэр, дьон харчытын иҥэриниигэ буруйдааҕынан билинэн, 4 сылга көҥүлүн быһары усулуобунайынан аахсан, 2 сыл 6 ыйга тургутар болдьоххо уурбута.
Маны таһынан, суут кини сокуоннайа суох дьайыыларыттан эмсэҕэлээбит дьон харчытын төлөттөрөр ирдэбиллэрин толорорго уурбута.
Биһиги корр., «Саха сирэ» хаһыат, edersaas.ru
Хаартыска: интэриниэттэн.