Бары билэрбит курдук, 2016 сыл Тупсарыы сылынан биллэриллэн, нэһилиэктэр бу өттүгэр элбэх үлэни үмүрүттүлэр.
Бүгүн Суорун Омоллоон аатынан Опера уонна балет тыйаатырыгар Тупсарыы сылын түмүктүүр уопсастыбаннас мунньаҕа ыытылынна. Мунньах иннинэ Тупсарыыга туох үлэ ыытыллыбытын көрдөрөр анал быыстапка буолла. Нэһилиэктэр тугу оҥорбуттарын, ситиспиттэрин хаартысканан уонна макет оҥорон аҕалбыттарын көрдөрдүлэр.
Мунньахха Тупсарыы сылыгар таһаарыылаахтык үлэлээбит муниципальнай тэриллиилэргэ анал номинациялары туттардылар. Ол курдук, «Болуоссаттары оҥорууга» Мэҥэ Хаҥалас улууһун Нөөрүктээйи (Павловскай), «Эркиннэри бастыҥ оҥорууга (фасадтары)» Дьокуускай куорат, «Дьон сылдьар ыллыгын оҥорууга» Усуйаана улууһун Депутатскай бөһүөлэгэ, «Уулуссалары сырдатыыга» Уус Алдан улууһун Бороҕон сэлиэнньэтэ, «Бастыҥ оҕо былаһаакката» Үөһээ Бүлүү улууһун Кэнтик нэһилиэгэ, «Бастыҥ спортивнай былаһаакка» Алдан улууһун Аллараа Куранаах сэлиэнньэтэ уонна «Олорор сири-уоту көҕөрдүү уонна пааркалары, сквердэри оҥорууга» Мирнэй куорат бастыҥнар ааттарын сүгэн, баһылыктар анал өйдөбүнньүк бэлиэнэн наҕараадаланнылар.
2017 сыл өрөспүүбүлүкэ үрдүнэн Ыччат сыл буоларын эттилэр. Онон Тупсарыы сыла түмүктэнэн, эстафета Ыччат сылыгар бэрилиннэ.