Дьокуускайга тупсаран оҥорууга куоластааһыҥҥа Кыайыы паарката инники күөҥҥэ иһэр.
Куорат 14,5 тыһ. тахса олохтооҕо Дьокуускай куорат эбийиэктэрин тупсарыыга онлайн-куоластааһыҥҥа кыттар. Ыам ыйын 21 күнүнээҕи иһитиннэриинэн, Кыайыы пааркатын тупсаран оҥорор туһугар 8 642 киһи куолаһын биэрбит. Сайсары күөл биэрэгин уонна Ийэ искибиэрин тупсарарга 5 780 киһи куоластаабыт.
Санатан эттэххэ, Арассыыйатаҕы уопсастыбаннай сири-уоту тупсаран оҥоруу үлэтигэр туһаайыллыбыт дизайн-бырайыактары таларга куоластааһын ыытылла турар. Манна Кыайыы пааркатын уонна Сайсары күөл кытылын тупсаран оҥорууга куоластыахха сөп. Куоластааһын za.gorodsreda.ru ыытыллар. Кыайыылаах бырайыактар федеральнай кыттыгас үбүлээһиҥҥэ тиксэллэр уонна 2022 сылга олоххо киллэриллэллэр.
Дизайн-бырайыагынан, «Кыайыы паарката» комплекс сиригэр-уотугар киин былаһаакка, мемориальный маршрут, бэлисипиэтинэн хатааһылыыр уонна сүүрэр суоллар, оҕолор оонньуур сирдэрэ, остуол оонньууларыгар уонна успуордунан дьарыктанарга анал сирдэр, фуд-корт, о.д.а. былааннаналлар.
Сайсары күөл уонна Ийэ искибиэрин тупсарыы дизайн-бырайыактарыгар, биэрэгинэн бэлисипиэтинэн сылдьарга уонна дьон хаамарыгар анал ыллыктар, «Триумф» аттыгар аһаҕас бассейн, успуордунан дьарыктанар сирдэр, о.д.а. бааллар. Ийэ искибиэрин тупсарыыга сылы эргиччи үлэлиир павильоннар, успуордунан дьарыктанар уонна оҕолор оонньуур анал былаһааккалара, о.д.а.киллэриллибиттэр.
Куоластааһын ыам ыйын 30 күнүгэр диэри ыытыллар.
Рейтиннээх куоластааһыҥҥа «Госуслуги» порталга киирэн регистрацияланаҕыт. Саайтка киирэн муниципальнай тэриллиини талаҕыт, za.gorodsreda.ru, куоластааһыҥҥа кыттар эбийиэктэри көрөҕүт. Куоластыан баҕалаахтар ханнык уопсастыбаннай сири-уоту тупсаран оҥорор наадатын талаҕыт.
+1
+1
+1
+1
+1
+1
+1