Сэтинньи 6 күнүгэр федеральнай “ТВ3” ханаалга, күнүс 2 чааска игирэ Туприналар тустарынан “Вернувшиеся” диэн документальнай биэриини көрдөрдүлэр.
Ханаал хамаандата алтынньыга Саха сиригэр кэлэн, анаан устан барбыттара. Анаабыр айылҕатын, туундара киэҥ унаарын, аата-ахса суох хайалары олус үчүгэйдик уһулбуттар. Үөһэттэн устубут уонна каартанан көрдөрөр буолан, барыта ырылхай, өйдөнөр. Манна хоту дойду олоҕун-дьаһаҕын, дьонун-сэргэтин көрдөрбүттэрэ кэрэхсэбиллээх.
2018 сыл алтынньытыгар Кэрэчээнэ Туприна, аҕата Олег Туприн уонна кини доҕоро хас да күн сүтэн, аймалҕан тахсыбытын өйдүүр буолуохтааххыт. Өрөспүүбүлүкэ бүттүүнэ кинилэри көрдүүллэрин тыыммакка да кэтээн көрбүтэ, көстүбүттэригэр үөрбүппүт-көппүппүт бу баар курдук.
Хас да күнү быһа аһа-үөлэ, үчүгэй халыҥ таҥаһа суох, 30 кыраадыс тымныыга туундараҕа хайдах тыыннаах ордубуттарай? Ол туһунан саас-сааһынан көрдөрөн, сыһыаннаах дьону – кыыс төрөппүттэрин, дьаһалта үлэһиттэрин, көрдөспүт дьону кытары кэпсэтэн, тиэмэни олус бэркэ арыйдылар.
Маны тэҥэ, биэриигэ бу түбэлтэ туһунан “Эдьиий, биһиги тыыннаахпыт!” кинигэни суруйбут суруналыыс Любовь Готовцева уонна Ил Дархан Айсен Николаев көрдөөһүн хайдах ыытыллыбытын туһунан кэпсээтилэр.
“ТВ3” ханаалга “Вернувшиеся” сиэрийэнэн мунан баран көстүбүт, тургутугу ааспыт дьон туһунан биэриилэри усталлар. Соторутааҕыта табаһыт Егор Кривошапкин туһунан эмиэ көрдөрбүттэрэ.
Ангелина Васильева, “Саха сирэ” хаһыат, edersaas.ru