Саха өрөспүүбүлүкэтигэр ааспыт 2017 сыл устата эрэгийиэннээҕи бырагыраама чэрчитинэн, 150 элбэх кыбартыыралаах олорор дьиэ хапытаалынай өрөмүөнү барда, 28 тыһ. киһи олорор усулуобуйатын тупсарда диэн ОДьКХ уонна энергетика министиэристибэтэ иһитиннэрэр.
Лифтэри уларытыы пилотнай бырайыагынан 29 элбэх этээстээх дьиэҕэ 57 лифт уларытыллыбыт, аны 43 элбэх этээстээх дьиэҕэ 103 лифт уларытыллыахтаах. Соҕотоҕун олорор, үлэлээбэт, 70 сааһын ааспыт, дьиэни бас билэр кырдьаҕастар хапытаалынай өрөмүөн усунуоһун төлөөбүт ороскуоттарын толуйууга үп көрүллэн, өрөспүүбүлүкэ үрдүнэн үс тыһыынча кэриҥэ киһи туһаммыт.
Өрөспүүбүлүкэ бүддьүөтүттэн тупсарыыга хас улуус ахсын 4,5 мөл. солк. көрүллэн, барыта 100 уопсастыбаннай туһаныллар сир (пааркалар, сквердэр), 140 оҕо оонньуур былаһааккалара, спортивнай былаһааккалар тутуллубуттар, 24 улууска уулуссалары сырдатар үлэ ыытыллыбыт.
Куорат сирдэргэ олох таһымын кэлим тупсарар сыалтан ылыллыбыт «Куорат тупсаҕай эйгэтин тэрийии» федеральнай бырайыакка кыттан, биһиги өрөспүүбүлүкэбит былырыын федерация бүддьүөтүттэн 199 мөл. солк. тардыбыта. Бу үпкэ тирэҕирэн, улуустарга дьон сылдьар, сынньанар уопсастыбаннай сирдэрин итиэннэ олбуордары тупсаран оҥорууга улахан хамсааһын саҕаламмыта. Биир тыһыынчаттан элбэх нэһилиэнньэлээх 111 сэлиэнньэлэргэ, бөһүөлэктэргэ уопсастыбаннай территориялар, түөлбэлэр саҥаттан учуокка ылыллыбыттара. Россия Тутууга министиэристибэтин Методическай сүбэтигэр олоҕуран, уопсастыбаннай дьүүллэһиилэр түмүктэринэн ыытыллыахтаах үлэлэр бэрээдэктэрэ бигэргэммитэ, 2018 сылтан саҕалаан 2022 сылы хабар аныгы куорат эйгэтин тэрийии бырагыраамаларын бырайыактара оҥоһуллан, олохтоохтор истиилэригэр таһаарыллыбыттара. Онон, олорор эйгэни тупсарыы хамсааһына муниципальнай уонна өрөспүүбүлүкэтээҕи тус сыаллаах бырагырааммаларга өрө тутуллар федеральнай бырайыагы дьүөрэлэһиннэрэн, үүммүт 2018 сылга өссө кэҥэтиллэн, далааһыннанан иһиэҕэ.
Раиса Сибирякова, Саха сирэ” хаһыат, edersaas.ru.