Туостан туох оҥоһуктары билэҕит? Өбүгэлэрбит туттар иһиттэрэ, ураһа, киэргэл, онтон ураты өссө тугу билэҕит? Ити ыйытыыларга хоруйдары бу күннэргэ турбут “Туос ситимэ” быыстапка кэмигэр биллим уонна саха талааныгар өссө төгүл итэҕэйдим.
Быыстапка П.П.Романов аатынан Дьокуускайдааҕы ойуулуур-дьүһүннүүр искусство кэллиэһигэр туоска үөрэтии салаата тэриллибитэ 5 сылыгар, оҕолору туоска уһуйар преподаватель Надежда Корнилова үйэ аҥаардаах үбүлүөйүгэр ананар.
Бэлиэ тэрээһин үгэс быһыытынан сахалыы сиэринэн, арыылаах алаадьынан аал уоту айах тутуунан саҕаланна.
Тэрээһиҥҥэ А.Е.Кулаковскай-Өксөкүлээх Өлөксөй аатынан норуоттар доҕордоһууларын дьиэтин дириэктэрэ Яна Игнатьева, “Симэх” норуот искусствотын уонна уус-уран оҥоһуктарын национальнай киинин дириэктэрэ, СӨ норуотун худуоһунньуга Александр Гоголев-Сата Уус, П.П.Романов аатынан Дьокуускайдааҕы ойуулуур-дьүһүннүүр искусство кэллиэһин үлэһиттэрэ, устудьуоннар төрөппүттэрэ, преподаватель Надежда Корнилова биир дойдулаахтара, Өлүөхүмэттэн төрүттээхтэр “Сомоҕо” түмсүүлэрин чилиэннэрэ, бииргэ үөрэммит доҕотторо, уо.д.а. муһуннулар.
Биир идэлээхтэрэ Надежда Егоровна үөрэнээччилэрин кытта хара сарсыардаттан киэһэ хойукка диэри олорон туоһунан иистэнэр көрдөрүүлэрэ баһырхайын бэлиэтииллэр. Уһуйуллааччыларын үлэлэрин хаачыстыбата, кээмэйэ таһыччы үрдүк таһымнааҕын чорботон эттилэр. Үөрэнээччилэрин кытта тута өйдөһөрүн, ол эрээри, бэрээдэги тутарын, ирдэбиллээҕин ыйаллар. Методическай үлэҕэ күүстээх преподаватель диэн бэлиэтииллэр. Баара-суоҕа биэс сыл иһигэр үөрэнээччилэрин араас тэрээһиннэргэ кытыннаран, аан дойду үрдүк таһымнаах куонкурустарыгар үгүс миэстэлэри ылбыттар. Устудьуоннар таһыччы таһымнаахтарын, үгүс сатабыллаахтарын кинилэр быыстапкаҕа турбут үлэлэрэ туоһулууллар. Манна ураһа иһин толору киэргэтииттэн, сахалыы киэргэлтэн саҕалаан, аныгылыы панноҕа тиийэ барыта баар. Өбүгэлэрбит күннээҕи олохторугар туттубут иһиттэрин-хомуостарын эгэлгэтин этэ даҕаны барыллыбат. Бу барыта үөрэҕи бүтэрээччилэр дипломнай үлэлэрэ, күннээҕи дьарыкка оҥорбут үлэлэрэ. Киһи эрэ сөҕүөн, хайгыан курдук, барыта туостан тигиллибит.
Сүүстэ истибиттээҕэр биирдэ көрбүт ордук диэн мээнэҕэ этиллибэт. “Туос ситимэ” ураты быыстапка ахсынньы 4-12 күннэригэр А.Е.Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр турар. Баран көрүҥ, сэргээҥ, туһаныҥ.
Людмила ПОПОВА, “Саха сирэ” хаһыат, edersaas.ru