Быйыл тохсунньу саҥата, Үөһээ Бүлүү Туобуйа нэһилиэгин олохтоохторо былырыын дьаһалта көҕүлээһининэн Саһыл Уйалаах үрэххэ тибиигэ аналлаах 100 м уһуннаах күрүөнү туппуттарын туһунан суруйбутум. Олунньу, кулун тутар ыйдарга Үөһээ Бүлүүлүүр суолларын үрдүнэн тибэн, тимир көлө иннинэн да кэннинэн барбат оҥорон, олохтоохтору эрэйдиирэ ханна барыай? Ону ити сөптөөх ньыманы тобулан, улахан эрэйи аны көрсүө суохтар.
Туобуйа нэһилиэгин баһылыга Степан Алексеев:
— Тибиини бохсор үлэни 2012 сылтан саҕалаабыппыт. Ити сыл Тиһик Марандатын диэн сиргэ 1 км уһуннаах анал күрүөнү (хаар онно мустарын гына — аапт.) Е.Ф. Лукин биригэдьиирдээх алта киһилээх биригээдэ туппута. Салгыы 2013 сыл сааһыгар Е.С. Егоров тыраахтарынан ээйдээх, маардаах сиргэ түөрт хорууну хорбута. Ити түмүгэр инчэҕэй сир кууран, талах, аабы үүнэн, билигин Тиһик күөлүгэр баар суолу тибии тибэрэ балайда аччаата. Итини тэҥэ, Саһыл Уйалаах үрэҕэр 100 м уһуннаах, 2 м үрдүктээх тиит харбыылынан күрүөнү субуотунньук тэрийэн туппуппут.
Маннык хабааннаах салгыы үлэлиибит. Бүгүн Валентин Петров салайааччылаах алта киһилээх биригээдэ Хойуо диэн тибиилээх аҕай сиргэ 100 м уһуннаах күрүө тута таҕыста. Баҕаналарын былырыын сир тоҥуон иннинэ туруорбуттара. Билигин тиит харбыылы саайа сылдьаллар да, барытыгар тиийэрэ саарбах. Хаалбытын аны күһүн ситэриэхпит. Хойуо күөлтэн хочуолунайга уу баһабыт. Саас суолу тибэн эрэйдээччи.
Саһыл Уйалаах сүнньүгэр, Сирэй Хайаҕа, Кураанах Чыбыыдаҕа, Сэргэлээххэ харбыыл күрүөнү эһиил тутар былааннаахпыт. Уопсайынан, маннык ньыма быдан көдьүүстээх эбит. Анал күрүөлээх сиргэ суол омоонун эрэ хаалларар гына аны типпэт. Улуус кииннэриттэн ыраах сытар нэһилиэктэр бу ньыманы туһаныаххытын сөп диэн сүбэлиибин.
й