Туобуйалар чэпчэтиилээх, социальнай суолталаах сөмөлүөтүнэн көтөргө бэлэмнэр

Үөһээ Бүлүү улууһун Туобуйа нэһилиэгэ улуус кииниттэн 250 км ыраах сытар. Саас, сайын, күһүн алларанан сырыы суоҕун кэриэтэ. Ол иһин, нэһилиэнньэ бэйэтин күүһүнэн дьаһалта көрүүтүгэр-истиитигэр баар авиабылаһааккаларыгар хапытаалынай өрөмүөн ыыппыттар. Александр ТАРАСОВ, «Саха сирэ» хаһыат, https://edersaas.ru

Туобуйа нэһилиэгин баһылыга Степан Алексеев:
— АН-2 сөмөлүөт Туобуйаҕа бүтэһигин 2002 сыллаахха сылдьыбыта. Балаһа мөлтөҕүн иһин көтүүттэн аккаастаммыттара.
Билигин былаһаакканы дьаһалтаны кытта дуогабардаһан олохтоох предприниматель В.Ф. Лукин өрөмүөннээтэ. Механизатордар А.К.Винокуров, Е.Ф.Лукин, Е.С.Егоров, Я.В.Лукин, В.Н.Абрамов, Я.Н. Кривошапкин сөптөөх үлэни ыытан, авиационнай хамыыһыйаҕа балаһаны туттардылар. Билигин күрүөтүн ситэрии эрэ хаалла.
Ыам ыйын 23 күнүгэр авиапорт бэрэстэбиитэлэ М.Г. Ильина көҕүлээһининэн, авиабылаһаакканы ыраастыыр уонна күрүөтүн абырахтыыр субуотунньук тэриллибитигэр, 30-тан тахса киһи кытынна. Быйыл Туобуйаҕа, былаан быһыытынан, сөмөлүөт чэпчэтиилээх 18 рейси оҥоруохтаах. Бастакы сырыы бүгүн, ыам ыйын 25 күнүгэр оҥоһуллан, бөртөлүөт кэлэн барда.