“Роспотребнадзор” управлениета иһитиннэрбитинэн, кулун тутар 21-27 күннэригэр 7782 киһи тумуулаабыттара биллибит. Ол иһигэр, 65% — оҕолор, 35% — улахан дьон. Тумууга эпидемиологическай боруок 21%-нан, оҕолорго 62,5%-нан таһынан тахсыбыт. Онон, ордук оҕолор элбэхтик тумуулууллар эбит.
Бу ааспыт нэдиэлэҕэ кэтээн көрүү түмүгүнэн, өрөспүүбүлүлүкэҕэ кириибинэн ыалдьыы бэлиэтэммэтэх. Ол эрээри кирииптэн атын вирустар бааллар: парагрипп — 56,3%, аденовирус – 21,9%, риновирус – 15,6%, RC-вирус – 6,3%.
Өрөспүүбүлүкэҕэ кирииби уонна коронавируснай инфекцияны утары быһыыны биэрии салҕанар. Бүгүҥҥү туругунан, коронавируһу утары быһыы бастакы укуолун 608 529 киһи (улахан дьон 84,9%-ра), иккис укуолун 569 249 киһи (улахан дьон 79,4%-ра) ылбыттар.
Ангелина Васильева, “Саха сирэ” хаһыат, edersaas.ru
Хаартыска: kurskadmin.ru