Тумулга ынах арыытын тупсаҕай усулуобуйаҕа астыахтара.
Ааспыт өрөбүллэргэ Тумул сэлиэнньэтигэр ынах арыытын астыыр саҥа сыах үөрүүлээх аһыллыыта буолла. Бу туһунан Хаҥалас улууһун дьаһалтатын пресс-киинигэр Тумул нэһилиэгин баһылыга Сахайаана Лукина иһитиннэрэр.
«Сыахпыт бу иннинэ 60 сыл анараа өттүгэр тутуллубут дьиэҕэ баара. Оттон бу саҥа сыах нэһилиэнньэ дьаһалтатын, меценат Алиш Забид-оглы Мамедов уонна «Хаҥалас-Ас» тэрилтэ ыкса ситимнээх үлэлэринэн ситиһилиннэ. Манна икки киһи үлэлиир, күҥҥэ 200 кг чугаһыыр үүтү туталлар, нэдиэлэҕэ 40 кг ынах арыытын оҥорон таһаараллар«, — диир кини.
Манна даҕатан эттэххэ, Тумулга өссө нэһилиэнньэттэн хонуу луугун, алтан төбөнү, эриэхэни тутар пуун баар. Оттон арыыны, сүөгэйи сүрүннээн тумуллар бэйэлэрэ, чугастааҕы нэһилиэктэр, оройуон киинигэр, ону таһынан туристар атыылаһаллар.
Санатар буоллахха, Хаҥалас улууһугар бу «Хаҥалас-Ас» тэрилтэ бастакы сыаҕа буолбатах. Былырыын Булгунньахтаахха тыа хаһаайыстыбатын аһын-үөлүн уонна сир аһын, Хачыкаакка «Булуус» сыыры астыыр сыахтар тэриллибиттэрэ. Онон хаҥаластар сыахтананнар саҥа үлэ миэстэлэрэ тэриллэллэр, оттон олохтоох нэһилиэнньэ эбии дохуот киллэринэр кыахтанар.
+1
+1
+1
+1
+1
+1
+1