Мэҥэ Хаҥалас улууһун «Тумул» кэпэрэтиибэ 440 сүөһүнү кыстатыахтаах.
Хаһаайыстыба быйыл сайын 683 гектарга туораахтаах култуураны ыспыт буоллаҕына, онтон 550 гектара бурдукка, 133 гектара сүөһү аһылыгар анаммыт. 51 гектардаах Хочой бааһынатын бурдугун сиилэскэ анаан бу күннэргэ быһан бүтэрдэ. Үс күннээх хомуурга комбайнердар Василий Свинобоев уонна Степан Стручков, бурдугу сиилэс траншеятыгар таһыыга “ЗиЛ” массыынанан Дмитрий Шараборин, “КамАЗ” массыынанан Геннадий Атласов үлэлээтилэр. Сиилэһи “МТЗ-12-21” тыраахтарынан Николай Десяткин дьиппинитэ тэбистэрдэ. Сиилэстээһиҥҥэ механизатордары сэргэ ыскылаат үлэһиттэрэ Нина Иванова уонна Николай Эверстов үлэлэстилэр.
Сүөһү аһылыгар ананан ыһыллыбыт 82 гектардаах бааһынаҕа күөх маассалааһын үлэтэ ыытыллар. Бу үлэҕэ ини-бии Юрий, Леонид Лукиннар атырдьах ыйын 21 күнүнээҕи туругунан, 45 гааны бүтэрдилэр диэн кэпэрэтиип салайааччыта Таисия Десяткина уонна агроном Тимур Десяткин кэпсээтилэр. Спиридон Десяткин урулуоннуур. Ардах мэһэйдээбит. Бурдук хомуурун ый 25-26 күннэриттэн саҕалыыр былааннаахтарын Таисия Васильевна этэр. Хомуурга механизатордар Петр Оконешников уонна Николай Десяткин үлэлээри бэлэмнэнэ сылдьаллар.
Аркадий Иннокентьев, «Саха сирэ», edersaas.ru