Уус Алдан улууһун Тулунатааҕы «Татыйык» уһуйааныгар Доруобуйа нэдиэлэтин түмүктүүр бэртээхэй тэрээһин ыытылынна.
Тэрээһини баай уопуттаах иитээччи, оҕолору эт-хаан өттүнэн иитиигэ үлэһит Мария Сергеева иилээн-саҕалаан ыытта. Эрчимнээх муусука доҕуһуолунан спортивнай таҥастаах оҕолор саалаҕа хааман киириилэрин төрөппүттэр ытыс тыаһынан көрүстүлэр.
Оҕолор сүргэлэрэ көтөҕүллэн туран доруобуйаны бөҕөргөтүүгэ туһуламмыт театрализованнай көрдөрүүнү сэргээн көрдүлэр. Остуоруйа, литература дьоруойдара — Айболиты, Мойдодыры кытта көрсөн, кинилэр сорудахтарын толорон, чөл, чэнчис буолуу быраабылаларын билэллэрин көрдөрөн, хара санаалаах бактериялары
киэр кыйдаан үөрдүлэр-көттүлэр.
Эрчимнээх хамсаныылаах араас эрчиллиилэри толордулар.
Мантан салгыы оҕолор төрөппүттэриниин үс аҥы хайдан бөлөҕүнэн араас спортивнай тэриллээх көрдөөх эстафетаҕа эгил-тэгил күрэх буолла. Кыракыйдартан саастаахтарга тиийэ көхтөөхтүк кыттан бары да астыннылар.
Тэрээһин түмүгэр төрөппүттэр уонна оҕолор араас матырыйаалтан оҕо этин- хаанын эрчийиигэ, хатырҕатыыга анаан оноһуктара мустубут дьон болҕомтотун тартылар. Күрэх түмүгүнэн бэлэмнэнии уонна улахан бөлөх оҕолоругар Акимова Валерия бастакы, Дарамаев Айсен иккис, Аргунов Давид үһүс, орто уонна кыра бөлөххө Троев Айсен бастакы, Федоров Дамир иккис, Новгородов Максим үһүс буоллулар.
Зинаида Васильева, «Эдэр саас» сайтка анаан