Уус Алдан улууһугар, Тулунаҕа, сайыҥҥы былдьаһыктаах күннэртэн сылайбыт-элэйбит дьону кыратык сынньата таарыйа, бэҕэһээ кулуупка бэртээхэй быыстапка буолла. Бу туһунан нэһилиэк бибилэтиэкэрэ Маргарита Неустроева сырдатта.
-Бэҕэһээ улууспут кииниттэн үс ыалдьыт, нэһилиэкпититтэн аҕыс киһи кыттыылаах быыстапканы олохтоохтор, оҕо-аймах көрөн улаханнык сэргэхсийдилэр. Тулуна олохтооҕо Анна Сторожева Өктөөп өрөбөлүүссүйэтин 100 сылын көрсө муспут малын-салын дьон-сэргэ көрүүтүгэр таһаарда. Манна октябренок быраабылата таҥаска уруһуйдаммытын, суруллубутун ууруна сылдьыбытын аҕалбытын, пионер хаалтыһын, комсомол значогун, Өктөөп бырааһынньыгынан эҕэрдэ аккырыыккалары көрбүт эрэ барыта астынна. “Оҕо сааспытыгар эргийэн ыллыбыт, уруккуну санаатыбыт”, — диэн саастаах өттө долгуйда, махтанна.
Саҥа үөрэх дьыла саҕаланара чугаһаабытынан, Татьяна Васильева муспут 221 чуораанчыгын аҕалбытын нэһилиэк олохтоохторо сөҕө-махтайа көрдүлэр. Эҥинэ бэйэлээх чуораанчыктары лыҥкынаттылар, ордук икки эрэ сантымыатырга чугаһыыр сулустаах пилотка чуораанчыгын тутааччы-хабааччы элбээтэ.
Кэрэ, кыраһыабай бэйэлээх куба киэргэллэрдээх Светлана Сергееваҕа ыйытыы элбэх буолла. Хаһааҥыттан мунньарын, тоҕо атын көтөрдөрү буолбакка кубалары талбытын, о.д.а. токкоолостулар.
Бу күн Мариса Васильева аҕалбыт 700-чэ ырыанньыгыттан ыллааччылар кытары баар буоллулар. Муусука үнүстүрүмүөннэрин статуэткаларын бары да манньыйа көрдүлэр. Сиэнинээн муусукаҕа сыһыаннаах “Муза”, “Соната”, о.д.а. араас ааттаах кэмпиэт сууларын мунньалларын билэн, сорохтор кэмпиэт суутун аҕалыах буолан үөртүлэр.
Тулуна оскуолатын быйыл бүтэрбит Николай Терентьев быыстапкаҕа кыттыбыта улаханнык хайҕанна. Коля эҥинэ бэйэлээх уруучукалара болҕомтону тартылар. Нэһилиэгин дьоно эдэр киһиэхэ ситиһиилэри баҕардылар, сонун уруучукаланнахтарына киниэхэ биэриэх буоллулар.
Улуус кииниттэн кэлэн кыттыбыт ыалдьыттар олохтоохтор махталларын ыллылар. Матрена Москвитина ат сүүрдүүтүн дьиэ кэргэнинэн сэргииллэрин, ол иһин онно аналлаах бырагыраамалары муспуттарын туһунан көрдөрө-көрдөрө кэпсээтэ. Манна хас сыллаахха ханнык ат хайдах сүүрбүтүн, көрдөрүүтүн суруйан испиттэрэ ордук уолаттары, эр дьону сэҥээртэ. Клара Бурцева ураты уруучукаларын, Татьяна Алексеева худуоһунньуктар хартыыналарын аҕалбыттарын кэрэхсээтилэр.
* * *
Нэһилиэк бибилэтиэкэрэ Маргарита Васильевна көҕүлээһининэн “Эркээйи” диэн значоктары, киэргэллэри, уруучукалары, о.д.а. тугу сөбүлүүллэрин мунньар дьарыктаах дьон түмсүүтэ 2003 сыллаахха тэриллибит. Манна уопсайа 11 киһи сылдьар. Түмсүүлэрин Мариса Васильева сатабыллаахтык салайар. “Эркээйилэр” нэһилиэк, улуус, өрөспүүбүлүкэ тэрээһиннэригэр, бырааһынньыктарга, куонкурустарга, быыстапкаларга көхтөөхтүк кытталлар.
Биһиги корр., «Саха сирэ» хаһыат, edersaas.ru