Аан дойду дьахталларын күнүн чэрчитинэн, Үөһээ Бүлүү улууһунааҕы киин бибилэтиэкэҕэ үгүс хоһоонноро ырыа буолан ылланар Светлана Егорова-Тулуйхаананы кытары «Кэрэни таҥара оҥостон» истиҥ-иһирэх көрсүһүү буолла.
edersaas.ru
Саха Өрөспүүбүлүкэтин үөрэҕэриитин туйгуна, Арассыыйа уопсай үөрэхтээһинин бочуоттаах үлэһитэ Светлана Егорова-Тулуйхаанаҕа аналлаах тэрээһин үрдүк таһымнаахтык ыытылынна. Светлана Георгиевна куорсун анньыммыт «Чэчир» литературнай түмсүүтүн бэрэстэбиитэллэрэ, биир идэлээхтэрэ, доҕотторо, ыаллыы олорбут атастара-доҕотторо, үөрэппит оҕолоро, поэзияны сөбүлүүр, кэрэни кэрэхсиир дьон мустубуттар.
«Санаа ситимэ» айар бөлөх Тулуйхаана хоһооннорун иэйэн-куойан туран ааҕан, тэрээһини олус киэргэттилэр. Ол иһигэр, биир дойдулаахтара Татьяна Винокурова-Сабыйа уонна Светлана Егорова-Тулуйхаана хоһооннорун ырыа гынан көтүппүт Екатерина уонна Алексей Егоровтар видео-эҕэрдэлэрин көрдүбүт, ырыаларын иһиттибит. СӨ Суруйааччыларын сойууһун чилиэнэ Валерий Васильев-Муттуххай Бороҥ эҕэрдэлээтэ, бэйэтин хоһооннорун аахта, кинигэлэрин бэлэхтээтэ.
Маннык дьоро күнү бэлэхтээбит оройуоннааҕы киин бибилэтиэкэ үлэһиттэригэр, чуолаан сэбиэдиссэй Наталья Кирилловнаҕа, ыытааччы Изабелла Петровнаҕа махталбытын тиэрдэбит. Бибилэтиэкэ үлэһиттэрэ араас идэлээх айар куттаах, интэриэһинэй дьарыктаах дьоннору кытта элбэх көрсүһүүнү тэрийэллэрин истэбит. Ону таһынан кэккэ бырайыактар ситиһиилээхтик үлэлииллэр. Бибилэтиэкэ ис-тас оҥоһуута аныгылыы, уурбут-туппут курдук, оттон тиэргэнэ — бөһүөлэк биир кэрэ көстүүлээх миэстэтэ. Ордук сайын сибэккинэн симэннэҕинэ, киһи эрэ дуоһуйар сирэ. Үөһээ Бүлүүттэн тахсыбыт биллэр суруйааччыларга аналлаах истиэндэ барыбытын долгутар. Онон, киин бибилэтиэкэ үлэтин, ыраах да буолларбыт истэ-билэ сылдьабыт, олус хайгыыбыт, киэн туттабыт.
Ксана САВВИНА, “Саха сирэ”, edersaas.ru анаан
Ааптар хаартыскалара