Саха Өрөспүүбүлүкэтин Ил Дарханын ыйааҕын тутуһан, үгүс дьон дьиэттэн тахсыбакка олорор.
edersaas.ru
Томпо оройуонуттан Дьокуускайга наадатынан кэлэ сылдьар СӨ үөрэҕин туйгуна, ыччат бэлиитикэтин туйгуна, Байаҕантай нэһилиэгин бочуоттаах олохтооҕо, РФ Суруналыыстарын сойууһун чилиэнэ Ирина Харайданова дьиэттэн тахсыбакка олорон, бу тиэмэҕэ анаммыт бэрт сэргэх хоһоону айан кэбистэ:
Түннүк нөҥүө ыраас халлаан
Тааһы курдаттаан күн күлэр,
Саҥа кэми эрэннэрэр,
Тууйуллумаҥ, мин баарбын,
Харысхал буолабын диир.
Тулуйан олоруох дьиэҕэ
Ааһар аастын түргэнник,
Күн аайы онон көрдөһүөх,
Үтүө тылбытын аныах
Аар Айылҕа ийэҕэ!
Үүнэр күнү ыралыырга
Саһарҕа ырыатын ыытар:
Харыстыах дуу эйгэбитин
Аал уоппут сылааһынан,
Ийэ тылбыт илгэтинэн,
Алаһа дьиэттэн тэйбэккэ,
Олоруох дьиэбитигэр тулуйан!
Онон, Ирина Харайданова эппитинии, тулуйан олоруоҕуҥ дьиэҕэ.
Женни СТРЮКОВА, “Саха сирэ” хаһыат
Хаартысканы И.Харайданова ыытта.