«Туллукчаан» уһуйаан сэбиэдиссэйин уонна иитээччитин үлэлэриттэн уһуллулар
Сайтпытыгар бу дьыл тохсунньу 25 күнүгэр «Намҥа икки оҕо уһуйаантан тахсан барыытын чахчытынан холуобунай дьыала тэрилиннэ» диэн иһитиннэриибит бэчээттэммитэ. Онно Нам улууһугар икки кыра оҕо уһуйаантан бэйэлэрэ тахсан барбыт чахчыларынан дьыала тэриллибитин туһунан суруйбуппут.
Санатан эттэххэ, дьыала РФ Холуобунай кодексатын 238-с ыст. 2-с чааһын «б» пуунунан көрүллэр буруй, ол эбэтэр, 6-гар диэри саастаах оҕолорго куттал суох буолуутун хааччыйыы ирдэбиллэригэр эппиэттээбэт өҥөлөрү толоруу бэлиэтэ баарынан тэриллибитэ.
Силиэстийэ сабаҕалыырынан, тохсунньу 17 күнүгэр Нам улууһун Нам сэлиэнньэтин «Туллукчаан» уһуйаанын (оҕо саадын) үрдүкү группатын иитээччитэ бэлэмнэнии бөлөҕүн оҕолорун ылбыт. Киэһэ 16.30 мүн. саҕана 5 саастаах икки кыра кыыс группаттан тахсан, музыкальнай саалаҕа барбыттар уонна иитээччи суох кэмигэр бэйэлэрэ таҥнан, дьиэлэригэр барбыттар.
Биирдэрэ чаас аҥаарынан дьиэтигэр тиийбит — бу оҕо тарбахтарын үлүппүт этэ, кинини Дьокуускай куорат ожоговай балыыһатыгар киллэрбиттэрэ.
Оттон иккис оҕону хараҥаҕа муна сылдьарын киэһэ 18.00 чаас кэнниттэн биир киһи булан, дьиэтигэр аҕалбыт — бу оҕо тымныйбыт.
Оҕолор сүппүттэрин киэһэ 17.00 чаас саҕана биир кыыһы ийэтэ ыла кэлбитигэр, биирдэ билбиттэр.
Эбэн эттэххэ, бу чахчынан Нам улууһун борокуратуурата Үөрэх управлениетын начаалынньыгар буруйдаах үлэһиттэри кытаанах дьиссипилиинэ эппиэтинэһигэр тардарга диэн представление ыыппыта.
СӨ Үөрэххэ уонна наукаҕа министиэристибэтин пресс-сулууспата иһитиннэрбитинэн, быһылаан буолаатын, миниистир Владимир Егоров бирикээһинэн оробуочай хамыыһыйа тэриллэн, сулууспанан бэрэбиэркэ саҕаламмыта. Хамыыһыйа Нам улууһугар тахсан, миэстэтигэр үлэлээбитэ.
Ол бэрэбиэркэ түмүгүнэн, бу «Туллукчаан» уһуйаан сэбиэдиссэйин уонна иитээччитин үлэлэриттэн уһулбуттар. Эбээһинэстэрин толорууга дьалаҕайдык сыһыаннаспыттарын иһин.
Оҕолор тустарынан эттэххэ, биир кыыс үтүөрэн, уһуйааныгар сылдьар. Оттон иккис кыыс Дьокуускай куоракка 2 №-дээх өрөспүүбүлүкэтээҕи ожоговай балыыһаҕа эмтэнэн, билигин олохтоох балыыһаҕа бэрэбээскигэ сылдьар.
Биһиги корр., «Саха сирэ» хаһыат, edersaas.ru
Хаартыска: РФ СК Саха сиринээҕи управлениета