ХИФУ ЕНФК (КФЕН) муус устар 20 күнүгэр «Отходы в доходы — 2018» диэн өрөспүүбүлүкэтээҕи IX-с научнай-практическай кэмпириэнсийэ ыытылларын туһунан СӨ Айылҕа харыстабылын министиэристибэтин пресс-сулууспата иһитиннэрэр.
Тэрээһин уопсастыбаны тулалыыр эйгэҕэ харыстабыллаахтык сыһыаннаһарга, туһаттан тахсыбыт малы-салы, бөҕү-саҕы харайыыга, онно саҥа ньыманы тобуларга, кыһалҕаны туоратарга тэрилтэлэр хардарыта сибээстээхтик үлэлииллэригэр ыҥырар сыаллаах-соруктаах тэриллэр.
Кэмпириэнсийэ чэрчитинэн «Экопроект» экологическай бырайыактар куонкурустара ыытыллар. Ол түмүгүнэн бастаабыт бырайыакка «СӨ үүнэр көлүөнэтин тус сыаллаах пуондата» кэммиэрчэскэйэ суох тэрилтэ уонна СӨ Айылҕа харыстабылын министиэристибэтин грана туттарыллыаҕа. Министиэристибэ пресс-сулууспата маны сэргэ маастар-кылаастар ыытыллалларын туһунан иһитиннэрэр. Ол курдук, манна мустубуттар пластик иһити-хомуоһу, оҥоһугу иккистээн хайдах туһанарга үөрэниэхтэрэ. Баҕалаахтар былакааттар, видеороликтар куонкурустарыгар кыттыахтара. Аныгы үйэ чэрчитинэн тулалыыр эйгэ, айылҕа тиэмэтигэр болҕомтону тардар флэш-моб ыытыллыа итиэннэ бэртээхэй быыстапкалар буолуохтара. Бу күн «ЭКО-Партнер» хампаанньаҕа бүппүт батареялары туттарыаххытын сөп. Онтон муус устар 21 күнүгэр сарсыарда 10 чаастан Сайсары күөлү ыраастааһыҥҥа субуотунньук ыытыллыаҕа.
edersaas.ru