Тулагы уонна Бүлүү оскуолалара успуорт былаһааккаланыахтара

СӨ Үөрэх уонна наука миниистирэ Михаил Сивцев  «Үөрэх» национальнай бырайыак иитинэн элбэх хайысханы толорор успуорт былаһаакката тутуллуохтаах сиригэр, П.И.Кочнев аатынан Тулагытааҕы орто оскуолаҕа сырытта. Бу туһунан тустаах министиэристибэ пресс-сулууспата иһитиннэрэр.

Дьокуускай таһынааҕы биир бастыҥ үлэлээҕинэн биллэр агротехнологическай хайысхалаах оскуола саҥа үөрэх дьыла саҕаланыытыгар саҥа усупорт былаһааккаланар. Суруйалларынан манна саас, күһүн хоккейдыахтара, сайынын футболлуохтара, волейболлуохтара уонна баксетболлуохтара. Былаһаакка 40 х 18 миэтэрэлээх буолар. Таһырдьа баар былаһааккаҕа тренажердар туруоруллуохтара.

Үөрэҕирии эйгэтигэр национальнай бырайыакка киирэр «Хас биирдии оҕо ситиһиитэ» эрэгийиэн бырайыагын иитинэн 2021 сылга маннык былаһааккалар икки оскуолаҕа баар буолуохтара.

Өссө биир хоккейдыыр сир Бүлүүгэ Сэбиэскэй Сойуус Дьоруойа Н.С.Степанов аатынан 3 №-дээх орто оскуолаҕа тутуллуо.

Миниистир Михаил Сивцев элбэх функцияны толорор былаһаакканы Саха сирин оскуолаларыгар тутуу аан бастаан ыытылларын бэлиэтиир. «Кэлэр өртүгэр  хоккейдыыр сирдэр сабыылаах буолалларыгар баҕарабыт, оччоҕуна оҕолор успуордунан сибиэһэй салгыҥҥа саас эрдэттэн улахан тымныылар түһүөхтэригэр диэри дьарыктанар кыахтаныахтара этэ. Оттугар уонна тутан олорорго улахан ороскуота суох  буоларын курдук быһаарар инибит дии саныыбын. Оччоҕуна биһиги үөрэнээччилэрбит успуорт кыһыҥҥы көрүҥнэригэр,  хоккейга эрэ буолбакка, хаҥкынан хатааһылыырга, керлиҥҥэ үөрэнэллэригэр, сайдалларыгар кыах үөскүө этэ», — диир миниистир.

Оскуола дириэктэрэ Андрей Пухов оскуола билиҥҥи үлэтин, инники былааннарын кэпсээтэ. Оскуола сиригэр тэпилииссэлэр бааллар, оҕуруот аһын хаһаанар саҥа сирдэммиттэр, оскуолаҕа маны сэргэ хортуоппуй, сүбүөкүлэ олордуутунан дьарыктаналлар, куурусса, индюк иитэллэр.

«Үөрэх» национальнай бырайыак иитинэн  тыа сирдэригэр уонна кыра куораттарга баар үөрэх кыһаларыгар физкултууранан уонна успуордунан дьарыктанар усулуобуйаны тэрийэргэ  (52 оскуола) 2021 сылга уопсайа 45 мөл.тахса солк. үп көрүллүбүт. Итинэн оскуолаларга биэс успуорт саалата өрөмүөннэнэр, биир аудиторияны физкултууранан уонна успуордунан дьарыктанарга анаан успуорт саалатыгар уларыталлар, 36 оскуола успуорт малынан-салынан уонна тэрилинэн хааччыллар, 10 оскуола успуорт малынан-салынан уонна аһаҕас сиргэ дьарыктанарга тэрилинэн хааччыллар.