Тулагы күһүн саҥа амбулаторияланыа.
Бу боппуруоһу Тулагы-Киллэм олохтоохторо сыллата ыытыллар бырабыыталыстыба отчуотугар туруорсубуттара уонтан тахса сыл буолла. Билигин ыра санаалара туоларыттан санаалара көтөҕүллэн сылдьаллар диэн иһитиннэрэр Дьокуускай куорат мэдиссиинэҕэ киинин пресс-сулууспата.
Тутуу «Доруобуйа харыстабылын бастакы сүһүөх звенотун саҥардыы» бырагыраама иитинэн ыытыллар. Бэдэрээтчит «Сибтрансстрой» ХЭУо. Саҥа амбулатория бу күһүн, балаҕан ыйыгар, аһыллыахтаах. Дьиэ холлоҕоһо бэлэм, онон көрөн хайдах амбулатория тутулларын быһаарыахха сөп.
Билигин үлэлиир турар уон куойкалаах стационардаах урукку амбултория 70-с сылларга тутуллубут. Бу кэм устатыгар мас дьиэ балачча эргэрбит. Оттон Тулагыга уонна Сыырдаахха нэһилиэнньэ ахсаана элбээн иһэр.
Балыыһаны иккитэ халаан уута ыла сылдьыбыт. Ол биллэн турар, туругар дьайбыт. Маныаха кэнники сылларга балыыһа кэлэктиип кыһамньытынан сабыллыбакка үлэлии турар диэн иһитиннэрэллэр. Тоҕо диэтэххэ, үлэһиттэр саккырыы турар сыбаҕын куруук абырахтыыллар, сыбыыллар, кырааскалыыллар, өрө тардаллар.
Олохтоохтор Наталья Трифонова салайааччылаах Тулагытааҕы амбулатория эйэлээх кэлэктиибин хайгыыллар. Манна мэдиссиинэ үлэһиттэрэ пациеннарын доруобуйаларын болҕомтолоохтук кэтээн көрөллөр, куораттан быраастары уонна нэһилиэнньэ доруобуйатын бэрэбиэркэлииргэ аналлаах аппарааттары куруук аҕалаллар. Онон саҥа модульнай балыыһаҕа кэлэктиип өссө таһаарыылаахтык үлэлииригэр бүк эрэнэллэр.
+1
+1
+1
+1
+1
+1
+1