Тулагы-Киллэм нэһилиэгэ (баһылык Александр Лебедев) 5 тыһ. 290 туонна оту соҕотуопкалыыр соруктаах. Итинтэн, күн бүгүҥҥү туругунан, 1 тыһ. туонна кэриҥэ от чөкөтүллүбүт.
Edersaas ru.
Арыыга кэлбит “хара” уу саҥа түһэн, маассабай оттооһун дьэ саҕаламмыт. Сайын бастакы аҥаарыгар курааннаан, үүнүү мөлтөһүөр эрээри, отчуттар (“Туймаада-МТС”, “Лигий” ХЭТ, чааһынай, бааһынай хаһаайыстыбалар) сыл тахсар отторун хааччынарга кыһанан үлэлии сылдьаллар.
Нэһилиэк дьаһалтата саха төрүт үгэһин сөргүтэн, оту илии хотуурунан охсууга күрэхтэһиини, ол эбэтэр “күүлэйи” тэрийиини иллэрээ сыл олохтообута. Быйылгы “күүлэй” от ыйын 28 күнүгэр Соhой арыыга буолан ааста. Барыта уон сэттэ охсооччу, ол иһигэр Хаҥалас улууһун Нөмүгүтүттэн тиийэ кэлэн кытыннылар.
Бэрт тыҥааһыннаах киирсии кэнниттэн эр дьоҥҥо Иннокентий Тобонов (Хаҥалас, Нөмүгү), дьахталларга олохтоох оскуола алын кылаастарга учуутала Июлия Григорьева, оҕолорго 11 кылаас үөрэнээччитэ Руслан Игнатьев уонна 10 кылаас үөрэнээччитэ Аина Хабарова бастаатылар. «Бастыҥ хадьымал» номинация хаһаайынынан Семен Афанасьев ааттанна. Кыайыылаахтарга уонна бириистээх миэстэлэргэ тиксибиттэргэ олохтоох дьаһалта, «Колми» ХЭТ (генеральнай дириэктэр Ил Түмэн дьокутаата Николай Румянцев), «Драгоценности Якутии» ХЭТ (генеральнай дириэктэр Василий Кычкин), П.И.Кочнев аатынан Тулагы орто оскуолата (дириэктэр Изабелла Иванова) уонна биирдэм урбаанньыт Ньургустаана Лукина олохтообут бириистэрэ туттарылынна. Бу туһунан биһиэхэ олохтоох дьаһалта тыа хаһаайыстыбатыгар исписэлииһэ Лариса Колачева иһитиннэрдэ.
Раиса СИБИРЯКОВА, “Саха сирэ” хаһыат, Edersaas ru.
