Маны аах Уопсастыба

Тулагы-Киллэм нэһилиэгэр амбулатория тутуллуо

Сотору кэминэн Тулагы-Киллэм нэһилиэгэр быраастаах амбулатория дьиэтэ тутуллуоҕа. Уу суола аһылыннаҕына, тута матырыйаалларын тиэйэн аҕалыахтаахтар. Бу тутуу «Модернизация первичного звена здравоохранения республики на 2021-2025 годы» эрэгийиэннээҕи бырагырааманан ыытыллыа.

Дьокуускай куора аттынааҕы Тулагы уонна Сыырдаах сэлиэнньэлэрин олохтоохторугар бу олус үөрүүлээх, кэтэһиилээх сонун. Амбулаторияны тутары олохтоохторо туруорсубуттара уонтан тахса сыл буолла.

Эргэ балыыһа дьиэтэ ааспыт үйэ 70-с сылларыгар тутуллубута. Сэлиэнньэ нэһилиэнньэтэ эбиллэр, оттон дьиэ эргэрэн иһэр, кыараҕас. Толору хааччыллыы суох, санитаркалар ууну, тобоҕу биэдэрэнэн таһаллар. Ону тэҥэ, дьиэ иккитэ халаан уутуттан эмсэҕэлээбитэ.

Бу бырагыраама аҕыйах нэһилиэнньэлээх, ыраах сытар, кыра сэлиэнньэлэр олохтоохторун мэдиссиинэ көмөтүнэн хааччыйарга туһуламмыт. Онон мэдиссиинэ тэрилтэлэрин тутууга, хапытаалынай өрөмүөнү ыытарга, анал тэриллэри, тырааныспары атыылаһарга, каадырынан хааччыйарга көмөлөөх.

2021-2023 сылларга доруобуйа харыстабылын бастакы сүһүөх тэрилтэлэрин саҥардыыга Саха сиргэ федеральнай бүддьүөттэн хаһааҥҥытааҕар да элбэх үбүлээһини — 6,5 миллиард солкуобайы ылар.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

0
0
Telegram @edersaas20