Тулагы сэлиэнньэтин 72 №-дээх “Кэнчээри” оҕо саада бу күннэргэ төрүттэммитэ 50 сылын туолла. Кэмбинээт 1966 сыл ахсынньытыгар тэриллибитэ итиэннэ “Дьокуускай” сопхуос бас билиитигэр бэриллибитэ.
Маһынан оттуллар оһохтоох, уруккута сопхуос хонтуоратын дьиэтигэр олохтоммута. Бастаан аһылларыгар баара-суоҕа икки эрэ бөлөхтөөҕө. Ол гынан баран оҕолору 6 ыйдарыттан ылаллара. Манна Маҕан, Сыырдаах, Киллэм, Марха, Капитоновка, Тулагы сэлиэнньэтиттэн “Дьокуускай” сопхуоска үлэлиир дьон оҕолоро сылдьаллара. Эмтэрэр ийэлэр быыс-арыт булан кырачааннарын аһатан бараллара. Бастакы сэбиэдиссэйинэн медик үөрэхтээх Зоя Бобровская анаммыта. Асчытынан С.Л.Ветрова, Е.М.Козлова үлэлээбиттэрэ. Кэмбинээт бастаан тэриллэригэр 50-60 иитиллээччилээх этэ. Биир даҕаны субуотаны көтүппэккэ, асчыттар 50 оҕоҕо уонна үлэһиттэргэ илиинэн оҥоһуллубут бэлимиэн оҥорон сиэтэр үтүө үгэстээхтэрэ.
Бу 50 сыл устата “Кэнчээри” оҕо саада 2500-тэн тахса оҕону иитэн таһаарда. Бүтүн үйэ аҥардаах кирбии бэйэтэ туспа историялаах, баай уопуттаах. Оҕо саадын үбүлүөйдээх үөрүүлээх тэрээһинигэр бэтэрээннэри, үлэһиттэри Ил Түмэн депутаттара Николай Румянцев, Алексей Еремеев, Дьокуускай куорат мунньаҕын депутаттара Сергей Черных, Антонина Титова, үөрэх управлениетын үлэһиттэрэ эҕэрдэлээтилэр. Тулагы-Киллэм нэһилиэгин дьаһалтата махтал үтүө тылларын тиэртэ.
Людмила ПОПОВА.