Бүлүү куоракка тулаайахтарга тутуллубут дьиэлэргэ сылдьан чахчы тымныыларын көрдүбүт. Былырыын сэтинньигэ Бүлүү улууһун «Олох суола» хаһыат маҥнайгы балаһатыгар төгүрүк тулаайах уонна төрөппүттэрэ суох хаалбыт оҕолор дьиэбит тымныы диэн ис хоһоонноох суруктара тахсыбыта. Бу ис дьиҥин билсэр сыаллаах суруйуу «Саха сирэ» хаһыакка (10.11.2016) тута бэчээттэммитэ. Тымныы кыбартыыралаахтар сэтинньи бүтүүтэ анал суругу Ил Дархаҥҥа ыыппыттара. Мантан сиэттэрэн, бу тулаайахтар дьиэлэрин туругун бэрэбиэркэлээн, хонтуруолга ыллыбыт.
Былырыын ахсынньы 9 күнүгэр таһырдьа 25 кыраадыс тымныыга «СӨ гигиенаҕа уонна эпидемиологияҕа киинэ» Мир уулусса 100 «а» №-дээх дьиэтин 1-кы кыбартыыратын температуратын бэрэбиэркэлээбит. Онно куукуна 13,2 (нуормата 18-26), утуйар хос 13,1 ( нуормата 18-24) уонна көрүдүөр 13,2 (нуормата 16-22) кыраадыс сылаас диэн быһаарбыттар. Көрөрбүт курдук, нуормаҕа толору эппиэттээбэт.
Онтон ахсынньы 28 күнүгэр Бүлүү улууһунааҕы «СӨ гигиенаҕа уонна эпидемиологияҕа киинэ» исписэлиистэрэ Мир уулусса 100 «а» №-дээх дьиэтин бастакы, иккис кыбартыыраларын температураларын эмиэ кээмэйдээбиттэр.
Бастакы кыбартыыра
| Кээмэй ыытыллыбыт сирэ | Муостаттан үрдүгэ, м | Кээмэй ыытыллыбыт бириэмэтэ | Кыбартыыра температурата |
| Мир уулусса 100 «а» №-дээх дьиэтин 1 кыбартыырата. Куукуна (ититэр ситим атта)
Куукуна (ортото) |
0,1
0,6 1,7 0,1 0,6 1,7 |
Күн бастакы аҥаара
Күн бастакы аҥаара |
15 Нуорма
15,2 18-26 15,2 14,4 Нуорма 14,4 18-26 14,4 |
| Олорор хос (ортото) | 0,1
0,6 1,7 |
Күн бастакы аҥаара | 14,6 Нуорма
14,8 18-24 14,8 |
Иккис кыбартыыра
| Мир уулусса 100 «а» №-дээх дьиэтин 4 кыбартыырата. Куукуна (ититэр ситим атта) | 0,1
0,6 |
Күн бастакы аҥаара | 14,7 Нуорма
14,7 18-26 14,7 |
| Куукуна (ортото) | 0,1
0,6 |
Күн бастакы аҥаара | 14,2 Нуорма
14,4 18-26 14,4 |
| Олорор хос (ортото) | 0,1
0,6 1,7 |
Күн бастакы аҥаара | 16,2 Нуорма
16,4 18-24 16,4 |
Бэрэбиэркэни оҥороллоругар таһырдьа 30 кыраадыс тымныы эбит. Боротокуолга Мир уулусса 100 «а» №-дээх дьиэтин бастакы, иккис кыбартыыраларын сылааһа нуормаҕа эппиэттээбэт диэн тустаах киин исписэлиистэрэ суруйбуттар.
Хочуолунайтан итии кэлиитэ нуормаҕа толору эппиэттиир
40-45 кыраадыс тымныыга дьиэ иһинээҕи температура көрдөрүүтэ атын буолуохтаах этэ. Тоҕо оннук диибиний? Ол курдук, ахсынньы 2 күнүгэр халлаан 30 кыраадыс тымныытыгар «ОДьКХ» ГУП Бүлүүтээҕи филиалын анал хамыыһыйата «ММС» хочуолунайтан бэриллэр итии Мир уулусса 100 «а» №-дээх дьиэтигэр төһө сойон тиийэрин бэрэбиэркэлээбиттэр. Онно көстөрүнэн, дьиэҕэ 79 кыраадыс итии бэриллибит уонна төттөрү 65 буолан төннүбүт. Маны «ОДьКХ» ГУП Бүлүүтээҕи филиалын кылаабынай инженерэ Семен Петров: «79 кыраадыстаах итии уу тиийэн баран, 65 буолан төннүүтэ улахан сойуу буолар. Бу, дьиэ эркиннэрэ, түннүктэрэ аһаҕас туралларын туоһулуур», – диэн этэр. Хочуолунайтан дьиэҕэ диэри итии бэриллиитэ нуормаҕа уонна графикка толору эппиэттиир эбит. Ол аата дьиэ хаачыстыбата суох тутуллубут эрэ диирбитигэр тиийэбит.
Тулаайахтары дьиэнэн хааччыйар анал бырагырааманан тутуллубут Мир уулусса 100 «а», 100 «б», Дружба переулок 18 уонна 18/1 №-дэрдээх дьиэлэрин кыбартыыларыгар сылдьан, олохтоохтортон ыйыталаһан, маҥнайгы мэндиэмэҥҥэ баар кыбартыыралар чахчы тымныыларын көрдүм. Кыбартыыралары кэрийэр кэмҥэ халлаан 35 кыраадыс тымныы этэ.
Мир уулусса 100 «а» №-дээх дьиэтин 1 кыбартыыратын олохтоохторо (Полион Никифоров,
Полион Никифоров: Кыбартыырабытыгар инчэҕэй тирээпкэ көрдөрбүтүнэн тоҥор, балкону пенофолунан сабан олоробун.
Сардаана Саввинова) куукунаҕа баар балкон аанынан уонна түннүгүнэн тымныы аһара үргүйэрин иһин ыксаан, итиини тутар полистирол матырыйаалынан барытын саба бүрүйэн кэбиспиттэр. Онон күһүөрү кыһыҥҥыттан куукуна түннүгүнэн таһырдьаны көрбөттөр, балкоҥҥа кыайан тахсыбаттар. Дьиҥэр, тымныы үргүйбэтэ эбитэ буоллар, тоҥ астарын-үөллэрин балкоҥҥа ууран, киирэ-тахса сылдьыахтаахтар этэ даҕаны, аны сааскыга диэри ыбылы сабарга күһэллибиттэр.
Мас тулааһыннаах дьиэ тымныы
Бу тулаайахтарга анаан тутуллубут дьиэлэр үксүлэрэ мас тулааһыннаахтар (каркаас) уонна итиини тутар матырыйаалынан бүрүллүбүттэр. Маннык ньыманан тутуллубут дьиэлэр тоҕо тымныы буолалларын ХИФУ инженернэй-техническэй институтун дириэктэрэ, техническэй наука доктора Терентий Корниловтан ыйыталаспыппытыгар: «Таһырдьаттан тымныы салгын ханнык баҕарар хайаҕаһынан күүскэ киирэр уратылаах. Ол иһин, мас тулааһыннаах дьиэлэргэ ити кыһалҕа күүскэ турар. Холобур, бетон эркининэн салгын хайа да балаһыанньаҕа киирбэт-тахсыбат. Итиини тутар ханнык баҕарар матырыйаал бетон курдук бүтэй буолбат, салгын курдаттыыр. Маннык матырыйааллар мас тулааһыннар икки ардыларыгар чиҥник киирэр курдуктар эрээри, син биир хайаҕастаах буолар. Маннык түгэҥҥэ дьиэ эркинэ тас өттүнэн хайаан да итиини тутар чиҥ матырыйаалынан эбии тутуллуон наада. Дьиэ муостатынан, эркининэн, үрдүнэн ханан да салгын тахсыбат, киирбэт гына, тиэрмэс курдук бүтэй буолуохтаах», – диэн эппиэттээтэ.
Кэлиҥҥи кэмҥэ тимир тулааһыннаах дьиэлэр матырыйаалларын тиэйии ороскуота кыра буолан, маннык ньыманы хоту улуустарга хото туһанан эрэллэр. Бу өйдөнөр. Оттон Бүлүү куоракка федеральнай суол баарын үрдүнэн, итинник кыра ороскуоттаах ньыманы туһанан хайдах маннык тымныы дьиэлэри туппуттара өйдөммөт. Салгыы хаһыат маны үөрэтэн бэрэбиэркэлиэҕэ.
Олохтоохтор санаалара
Полион Никифоров, Мир уулусса 100 «а» №-дээх дьиэтин 1-кы кыбартыыратын (бастакы подъезд) олохтооҕо:
— Кыбартыырабыт олус тымныы. Таһырдьа 45 кыраадыс тымныйбытыгар, куукунаҕа инчэҕэй тирээпкэ көрдөрбүтүнэн тоҥоро. Утуйар хоспутугар обогреватели туһанабыт. Онон эрэ сылыйбыта буолар. Түүннэри холбуур буолан, счетчик харчыны эрийэр. Ый аайы коммунальнай төлөбүрү таһынан уоту туһаммыппыт иһин 5000 солк. эбии төлүүбүт. Бу хармааммытыгар охсуута улахан.
Рустам Васильев, Мир уулусса 100 “а”№-дээх дьиэтин 2-с кыбартыыратын (бастакы подъезд) олохтооҕо:
— Кыбартыырабыт олус тымныы. Дьиҥэр, ититэр ситим оннук-айылаах мөлтөх буолбатах, сылааһы биэрэр. Дьиэ оҥоһуута мөлтөх. Балкон аанынан, стеклопакет түннүктэринэн тымныы таптаабытынан үргүйэр.
Михаил Сава, Мир уулусса 100 “а”№-дээх дьиэтин 13 кыбартыыратын (иккис подъезд) олохтооҕо:
— Ититэр ситиммит барбах мүлүркэй эрэ. Бу күһүҥҥүттэн куукунаҕа аһыы иликпит, тымныыта бэрт. Үксүн саалаҕа олоробут. Ол курдук, обогреватели күнүстэри-түүннэри туһанабыт. Муостабыт тымныы.
Петр Николаев, Ньургустаана Семенова, Мир уулусса 100 «а» №-дээх дьиэтин 12 кыбартыыратын (иккис подъезд) олохтоохторо:
— Балкон аанынан, стеклопакет түннүктэринэн тымныы үргүйэ турар, муостатынан эмиэ тымныйар. Саалаҕа, аттынааҕы ыаллар курдук, обогреватели туһанан кыһыны туораан эрэбит. Куукунаҕа чааскылаах чэйбит түүн тоҥон хаалбыт буолар.
Валентин Павлов, Дружба переулок 8 «а» №-дээх дьиэтин олохтооҕо:
— Үрдүнэн-аннынан тутуллубут дьиэ. Олус тымныы этэ. Ону бэйэбит күүспүтүнэн эбии ититэр ситими туруоран, хат ханапаахылаан син сылыттыбыт. Халлаан хам ыллаҕына, муостатынан тымныйар. Ону обогреватель холбонон, син кыһыны мүччү түһэбит.
Виталий Кондаков, Дружба переулок 18/1 №-дээх дьиэтин 1 кыбартыыратын олохтооҕо:
— Бу күһүн тымныйыах курдугун билэн, муоста үрдүнэн эбии линолеум тэлгэппиппит, стеклопакет түннүк ыпсар сирин ханапаахылаан биэрбиппит. Син сылаас курдук буолбута эрээри, муостатынан тымныйар. Обогреватель көмөтүнэн олоробут. Ол, биллэн турар, хармааҥҥа охсор. 2015 сыл ахсынньытыгар кэргэмминээн иккиэн бу дьиэҕэ социальнай бырагырааманан икки кыбартыыраны ылбыппыт. Биирин туолбут кыыспыт сотору-сотору тумуулаан ыалдьар. Стеклопакет түннүк холуодатынан аһаҕас турарынан тымныы салгын көҥүл киирэр. Күһүөрү күһүн иккис подъезка ититэр ситимҥэ носуос туруорбуттарыгар, син сылыйбыта курдук буолбута эрээри, муоста тымныы.
Иван ВАСИЛЬЕВ.