Бу күннэргэ «Берегиня» оҕо дьиэтин иитиллээччилэрэ (төрөппүт көрүүтэ-истиитэ суох хаалбыт оҕолоро) уонна Тулаайах кыаммат оҕолорго өйөбүл киинин оҕолоро бэртээхэй бэлэхтэри туттулар.
edersaas.ru
Оҕо дьиэлэригэр ыытыллыбыт аһымал аахсыйаны СӨ Эргиэн промышленнай балаататын сойууһун «Якутская Ярмарка» тэрилтэтэ уонна СӨ Арктика дьыалатыгар Судаарыстыбаннай кэмитиэтин бэрэстэбиитэллэрэ тэрийдилэр.
Аһымал аахсыйа Дьокуускай к. Комсомольскай болуоссатыгар кулун тутар саҥатыгар сыл аайы ыытыллар «Саха сирин балыга» быыстапка-дьаарбаҥка чэрчитинэн буолла. Бу тэрээһин кэмигэр ыалдьыттары балык миининэн күндүлээбиттэрэ. Быыстапканы тэрийэр кэмитиэт аһымал пуондатыгар ким төһө харчыны угара хаарчахтамматын, миин атыылаһыллыбыт үбэ оҕолорго бэлэх быһыытынан барарын туһунан эппитэ.
Хомуллубут харчы билигин оҕолорго канцелярскай тээбириннэрининэн, оҕону айар уонна толкуйдатар бэртээхэй бэлэх буолан киирдэ.
Елена ПОТОЦКАЯ, «Саха сирэ» хаһыат, edersaas.ru