«Туймаада» судаарыстыбаннай вокальнай ансаамбыл быйылгы «Мама, ты мой ясный свет» бырааһынньыктааҕы кэнсиэрин Арассыыйа Ийэлэрин күнүгэр анаата.
«Туймаада» ансаамбыл үгэс буолбут бырааһынньыктааҕы туруорууларыттан быйыл сэтинньи 24 күнүнээҕи кэнсиэрэ элбэх уратылаах буолла. Ол курдук, айар кэлэктиип бу бырагырааматын өрөспүүбүлүкэҕэ хас да бэлиэ түгэни кытта ситимнээтэ. Ол эбэтэр:
— Күн сиригэр күндүттэн күндү киһибитигэр — Ийэҕэ анаммыт бырагыраама сахалыы уонна нууччалыы ырыалартан турда;
— «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиринээҕи отделениетын бэрэссэдээтэлэ Прасковья Борисова истиҥ эҕэрдэтин тириэртэ;
— Кэнсиэр Дьокуускай куоракка Перинатальнай киин таһыгар педиатр-бырааска анаммыт саҥа скульптура аһылларынан, элбэх үрүҥ халааттаах аанньал кэнсиэркэ ыҥырыылаах ыалдьыт буолла.
2015 сыллаахха Опера уонна балет тыйаатырын сыанатыгар «Туймаадалар» «Поговори со мною мама» кэнсиэртэригэр «Арассыыйа ийэлэрэ» бэрэссэдээтэлэ Прасковья Борисова дьахталлары, ийэлэри, дьиэ кэргэн укулаатын чиэстээһини ис сүрэҕиттэн өйөөн эҕэрдэлээһинэ ансаамбылы ийэҕэ аналлаах бырагыраамалары сыл аайы оҥороругар көҕүлээбитэ. Онтон ыла норуот таптыыр ансаамбыла «Поговори со мною, мама» (2015 с.), «Ийэбэр аныыбын» (2016 с.), «Ийэҕэ махтал» (2017 с.), «Күн ийэм барахсан» (2018 с.), «Күн күбэй ийэҕэ » (2019 с.), «Любви слова» (2020 с.) бырагыраамалары бэлэх ууммутун көрөөччүлэр күн бүгүҥҥэ диэри умнубаттар.
Прасковья Борисова быйылгы «Мама, ты мой ясный свет» кэнсиэри көрсө эҕэрдэтигэр:
«…Бүгүн, бу кэрэ-бэлиэ күн «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиринээҕи отделениетын аатыттан «Туймаада» судаарыстыбаннай вокальнай ансаамбылга биһиги ийэлэрбитигэр чаҕылхай, кыраһыабай бэлэхтэрин -– сыл аайы Ийэ күнүгэр аныыр бырааһынньыктааҕы кэнсиэртэрин иһин махталбын этэбин. Убаастабыллаах Светлана Павловнаҕа уонна ансаамбыл кэлэктиибигэр Дьахтары -– Ийэни, Тапталы уонна Дьиэ кэргэни уруйдуургутугар уонна айхаллыыргытыгар махтал. Ийэ күнүгэр саамай күндү дьоммутугар -– ийэлэрбитигэр кэнсиэр тэрийэҥҥит, бэйэҕит көрөөччүлэргитигэр ансаамбыл ырыатын нөҥүө ийэлэригэр улахан махталларын, истиҥ тапталларын уонна таптыыр киһилэригэр ситэ этиллибэтэх тапталларыгар билинэллэригэр кыаҕы биэрэҕит. Бу күн хас биирдии ийэҕэ саамай үтүө, саамай кыраһыабай ырыалар ылланныннар», -– диэн баҕа санаатын тириэртэ.
«Туймаадалар» кэнсиэртэригэр Саха Өрөспүүбүлүкэтин доруобуйатын харыстабылын бэтэрээнэ, үрдүк категориялаах педиатр-быраас, ССРС доруобуйатын харыстабылын туйгуна, САССР үтүөлээх бырааһа Александра Дмитриевна Кычкина туһунан ахтан-санаан ааспыттара, кини сырдык кэриэһигэр ылбаҕай ырыаларын анаабыттара мээнэҕэ буолбата. Сарсыныгар, сэтинньи 25 күнүгэр Өрөспүүбүлүкэтээҕи килиниичэскэй балыыһа Перинатальнай киинин таһыгар арыллыбыт Ийэ скульптуратыгар Александра Кычкина уобараһа үйэтитилиннэ.
Александра Дмитриевна 1980 сыллаахха дьиэ кэргэнинээн Дьокуускайга көһөн кэлиэхтэриттэн оҕо өрөспүүбүлүкэтээҕи балыыһатын (кэлин Педиатрия киинигэр тиийэ улааппыта) салайбыта. Кини өрөспүүбүлүкэ доруобуйатын харыстабылыгар 45 сылын анаабыта. Кэргэнэ, судаарыстыбаннай-бартыыйынай үлэһит Егор Дмитриевич Кычкины ханна аныылларынан, Уус Маайа, Өймөкөөн уонна Томпо улуустарыгар үлэлээн, бар дьонун тапталын ылбыта. А.Кычкина Саха сиригэр педиатрия сулууспатын сайдыытыгар биллэр кылаатын киллэрбитэ, чуолаан доруобуйаны чөлүгэр түһэриигэ, ыарыыны быһаарыы уонна эмтээһин саҥа технологияларын туһаныыга, орто сүһүөх мэдиссиинискэй үлэһиттэри бэлэмнээһиҥҥэ улахан болҕомтотун уурбута.
«Мама, ты мой ясный свет» күүтүүлээх кэнсиэркэ көрөөччүлэр кинилэргэ анаммыт ырыалартан эрэ буолбакка, кэлэктиип саҥа састаабын, эдэр ырыаһыттар талааннарын арыйбыттарыттан астынан тарҕастылар. Онтон ансаамбыл тэриллиэҕиттэн үлэлиир артыыстарбытыгар тапталлара хаһан да уҕараабатын күүстээх ытыстарын тыаһынан биллэрдилэр.
Надежда ЕГОРОВА-НАМЫЛЫ, «Саха сирэ», edersaas.ru сайт.
Ансаамбыл пресс-сулууспатын хаартыскалара