Бэс ыйын 23-24 күннэригэр ыытыллар күүтүүлээх-кэтэһиилээх чулуу Туймаадабыт Үрүҥ тунах ыһыаҕын ханнык саҥа, сонун куонкурустар, күрэхтэһиилэр киэргэтиэхтэрэй, дьон болҕомтотун тардыахтарай?
Бу ыйытыыга хоруйдуур биһиги тапталлаах киин куораппыт ыһыаҕын Култуурунай барылын иилиир-саҕалыыр тэрийээччи Ньургуйаана Ушницкая:
—Бастатан туран, үүммүт Үрүҥ тунах ыһыахпытынан бар дьоммутун эҕэрдэлиибин. Бука бары кэлиҥ, сылдьыҥ, көрүҥ, ыһыахха көхтөөхтүк кыттыҥ диэн, биһиги тэрийээччилэр ыҥырабыт.
Туймаада ыһыаҕар быйыл уопсайа 120-тэн тахса тэрээһин буолар. Онтон 111-рэ – сүрүн. Биллэн турар, саҥа, сонун күрэхтэһиилэр, куонкурустар бааллар.
Холобур, “Хомус – дьиэ кэргэн биһигэ” диэн дьиэ кэргэнинэн хомус ансаамбылларын күрэхтэһиитэ ыытыллыаҕа.
Оҕолорго анаан аан бастаан “Толбоннурар уһун суһуох” куонкурус буолуоҕа.
Хотугу норуоттар умнулла быһыытыйбыт былыргы норуот ырыаларын куонкурус-бэстибээллэрэ дьон болҕомтотун тардыаҕа дии саныыбын.
Биир саҥа сүүрээн—быйыл аан бастаан “Ынахсыт тардыыта” – сүөһүнү-сылгыны тэнитии, тыа хаһаайыстыбатын өрө көтөҕүү, төрүт дьарыкпытын чөлүгэр түһэриигэ, сайыннарыыга аналлаах сиэр-туом, хамсааһын оҥоһуллуоҕа.
“Үс Хатыҥҥа” 99 сэргэ турар. Онно, Аан аартыктан саҕалаан, Аар Кудук Мастан Алтан сэргэҕэ диэри эмиэ 99 сылгы баайыллан туруоҕа.
Аны, “Саха таҥаһа” куонкуруспутугар, урукку ыһыахтарга баҕалаах барыта кыттара. Билигин дьон сахалыы таҥнар буолла. Онон, аны саха үгэс буолбут таҥаһыгар болҕомтону күүһүрдэр санаа баар. Дьүүллүүр сүбэ кыһыҥҥы толору таҥаһы, сайыҥҥы ыһыахха кэтэр дьахтар, эр киһи үгэс буолбут таҥастарын көрүөҕэ. Куонкуруска араас улуустартан, куораттартан, саха төрүт дьарыгын өрө тутар иистэнньэҥнэр, уустар кыттыахтара.
“Саха таҥаһа” куонкурус, атын да күрэхтэһиилэр, кэнсиэрдэр “Кымыс кырдалыгар” быйыл тутуллубут сабыс саҥа улахан кэнсиэрдиир сценаҕа ыытыллыахтара.
Туймаада ыһыаҕар “Саргылаах саха кылыһахтаах куолаһа” саха фольклоругар куонкурус уонна быйылгы Оһуохай күрэхтэһиитэ Былатыан Ойуунускай төрөөбүтэ 125 сылыгар ананаллар.
Татьяна МАРКОВА.