“Чуораанчык” уонна “Колокольчик” сурунааллар көҕүлээһиннэринэн, уһуйаан иитиллээччилэригэр уонна алын сүһүөх кылаас кыргыттарыгар анаан өрөспүүбүлүкэтээҕи «Уһун суһуох-2018» куонкурус икки түһүмэҕинэн ыытылынна.
Маҥнайгы түһүмэххэ Амма Аччыгыйын аатынан “Кэскил” ГАУ дириэктэрэ Анжелика Андреева, визажист Мария Давыдова, «Арчы»» дьиэтин дириэктэрэ Валентина Бочонина, культуролог Семен Протопопов, “Совершенство” устуудьуйа дириэктэрин солбуйааччы, фотограф Айыына Егорова уонна “Чуораанчык”, “Колокольчик” сурунааллар кылаабынай эрэдээктэрдэрэ Татьяна Жиркова састааптаах дьүүллүүр сүбэ кыргыттар хаартыскаларын көрөн, барыта 60 кытааччыттан 20 кыыһы сүүмэрдээн ылбыта.
Финалга киирбит 20 кыыс, “Тойук тоҕойо” «Арчы» дьиэтин түһүлгэтигэр анаан-минээн оҥостон, симэнэн кэлэн кытынна. Дьүүллүүр сүбэҕэ Татьяна Жиркова, Айыына Егорова, Валентина Бочонина уонна “Айыы Куо” дириэктэрэ, “Айсар” уопсастыбаннай организация бэрэссэдээтэлэ Александр Григорьев-Саалтааны, “Саха кукла” хампаанньа салайааччыта Анна Бочкарева кыттыспыттара. Кэрэчээн кыргыттар бука бары анал ааттары ылан, “Эгэлгэ” ювелирнай хампаанньа, “Бичик”, Вера Ноева кумааҕы куукулаларын наборун, “Саха кукла” куукулатын уонна “Мандарин” сынньанар киин, “Совершенство” устуудьуйа сэртипикээттэрин бэлэх ыллылар.
Оскуола үөрэнээччилэригэр: “Мисс Уһун суһуох-2018” Виталина Эверстова (Дьокуускай к.), “I вице мисс Уһун суһуох» Лена Прибылых (Мэҥэ Хаҥалас, Аллараа Бэстээх), “II вице мисс Уһун суһуох” Сайаана Олесова (Мэҥэ-Хаҥалас, Төҥүлү).
Уһуйаан иитиллээччилэригэр: “Мисс уһун суһуох-2018” Сайаана Лебедева (Нам), “I вице мисс Уһун суһуох» Екатерина Андреева (Дьокуускай), “II вице мисс Уһун суһуох» Виолетта Томская (Дьокуускай к.).
Төрүт култуура сайдарыгар, тарҕаныгар биир ситимнээх үлэбитин өйөөбүттэрин иһин Дьокуускай куорат духуобунаһын уонна култууратын салаатын начаалынньыгар А.Н.Корякинаҕа, «Арчы» дьиэтин дириэктэригэр В.И.Бочонинаҕа махталбытын тиэрдэбит.
edersaas.ru саайтка анаан Вероника АЛЕКСАНДРОВА.