Сүрүн Уопсастыба

Туймаада ыһыаҕар “Саха сирэ” хаһыат ырыа күрэһин ыытта

Туймаада ыһыаҕын кэмигэр “Саха сирэ” хаһыат эрэдээксийэтэ уонна “Сахамедиа” холдинг “Ыллыыр Саха сирэ” диэн ырыа күрэһин уонна сүүйтэриитэ суох лотереяны тэрийэн ыыттылар.

Ырыа күрэһэр кыттарга сүүрбэччэ сайаапка киирбитэ, сорохтор кыайан кэлбэтилэр. Кыттааччылар улуустартан анаан айаннаан, бэлэмнэнэн кэлэн кытыннылар. Холобур, 86 саастаах Роза Окоемова Бороҕонтон, Иван Аммосов Сунтаартан, Антонида Шестакова, Иван Тордуянов Уус Алдантан, «Дьүөгэлэр» ансаамбыл  Намтан, Ариан Федоров Үөһээ Бүлүүттэн айаннаан кэлбиттэр.

Дьиҥ-чахчы талааннар норуокка бааллар. Идэтийэн ыллаабат эрээри, айылҕа биэрбитинэн, айар кут имнэниитинэн, ыллыы-туойа, кэрэни, сырдыгы бэлэхтии сылдьар дьон элбэх. Ону бу күрэскэ өссө төгүл итэҕэйдибит.

Күрэс түмүгүнэн, 1-кы миэстэни Ариан Федоров ылан, SMART тэлэбиисэри бириискэ тутта, 2-с миэстэни Иван Тордуянов, 3-с миэстэни  Иван Аммосов ыллылар, сыаналаах бириистэри туттулар. Бары кыттааччылар туоһу суругунан, “Камелек” хампаанньа сэртипикээтинэн наҕараадаланнылар.

Ырыа күрэһин кэмигэр сүүйтэриитэ суох лотерея оонньонно. Сүүйтэриитэ суох, тоҕо диэтэр, 500 солкуобайдаах билиэти атыыласпыт киһи 3 ыйга “Саха сирэ” хаһыаты тутар, өрөспүүбүлүкэ бары сонунун-нуомаһын, ырытыылаах ыстатыйалары ааҕар, ону таһынан сыаналаах бирииһи сүүйүөн сөп. Онон бары сүүйүүлээх хаалаллар. Сүрүн бириис – матассыыкыл! Ону таһынан, бэлисипиэт, балааккалар, айаҥҥа илдьэ сылдьыахха сөптөөх, хомуллар остуоллар, устууллар, кириэһилэлэр, утуйар мөһөөччүктэр, пледтэр, тиэрмэстэр, о.д.а. туһалаах маллар оонньоннулар.

 

Манна соһуччу түгэннэр эмиэ буоллулар. Бииргэ төрөөбүттэр Айталина Бочкарева, Татьяна Яковлева, Егор Васильев Уус Алдан Бээрийэтиттэн сылдьаллар. Кинилэргэ сиэн бырааттара билиэт тарҕатааччынан үлэлии сылдьан, атыылаабыт. Бу билиэттэр бары сүүйүүлээх буоллулар – ас буһарар “жаровня” иһити, утуйар мөһөөччүгү, даачаҕа, пляжка туттуллар, хомуллар улахан зонты сүүйдүлэр. “Хаһан да, тугу да сүүйбэт этибит, бу аан бастаан сүүйбүппүтүттэн бэйэбит да олус соһуйдубут, үөрдүбүт”, — дэһэллэр кинилэр.

Аны бэлисипиэти ырыа күрэһэр кыайбыт Ариан Федоров сүүйэн, үөрүүтэ икки бүк үрдээтэ. Тута тимир көлөтүн үрдүгэр түһэн, миинэн, түһүлгэни эргийэн көрдөрдө. Уолга анаммыт курдук сөрү-сөп көлө эбит, дьэ, абыранар буолбут.

Оттон сүрүн бирииһи — матассыыкылы сүүйбүт, Мархаҕа олорор, учуутал идэлээх Лидия Гаврильева маннык кэпсиир:

— “Саха сирэ” хаһыаты уруккуттан ааҕабын, лотерея буоларын туһунан биллэриини “батсаапка” көрбүтүм, тута атыыласпытым. Чахчыта, хаһан да сүүйбэт этим. Ол эрээри, улахан бириистэр кэлбиттэригэр испэр “миэнэ!” дии олорбутум. Кэргэним, уолум, кыыһым төһө эрэ үөрэллэр! Матассыыкылы туһаҕа таһаарыахпыт диэн эрэннэрэбин. Үрүҥ Тунах ыһыах биһиэхэ үөрүүнү, табыллыыны тосхойдо. Хаһыат ааҕааччыларыгар дьолу-соргуну, чэгиэн буолууну, баҕа санаа туолуутун баҕарабын. Күүскэ баҕарыахха эрэ наада, баҕа санаа туолар эбит!

 

 Ангелина Васильева, “Саха сирэ” хаһыат, edersaas.ru

0
0
Telegram @edersaas20