Бэс ыйын 22-25 күннэригэр Саха сиригэр Татарстан Өрөспүүбүлүкэтин күннэрэ ыытыллыахтара. Икки өрөспүүбүлүкэ хардарыта сыһыаннарыгар улахан суолталаах тэрээһиннэргэ Татарстан бэрэсидьиэнэ Рустам Минниханов кыттыыны ылыаҕа.
Саха сирин ырыынагар тахсыахтарын баҕалаах урбаанньыттар, артыыстар, суруйааччылар, норуот маастардарын 200-чэкэ киһилээх улахан дэлэгээссийэлэрэ кэлиэҕэ.
Былырыын Татарстаҥҥа ыытыллыбыт Саха сирин күннэригэр Ил Түмэни, бырабыыталыстыбаны кытары бииргэ үлэлииргэ, култуура эйгэтигэр алтыһыыга сөбүлэһиилэргэ илии баттаммыта. Олус дириҥ ис хоһоонноох алтыһыы буолбута. Ол онтон сиэттэрэн, Татарстан күннэрэ ыытыллаллар.
Тутуу эйгэтигэр “АкБарсСтрой” тутуу холдина уонна Жатайдааҕы суудуна оҥорор тэрилтэ бииргэ үлэлиир туһунан сөбүлэһиигэ илии баттаһыахтара. Татаардар манна тиэхиникэни атыылыырга интэриэстээхтэр. Өрөспүүбүлүкэ бүддьүөтүн үбүлээн олорор “КАМАЗ” тэрилтэ эмиэ кыттыыны ылар. ХИФУ уонна “КАМАЗ” тэрилтэ тиэхиникэни кыһыҥҥы тоһуттар тымныыга чинчийиэхтэрэ. Саха сирин киэҥ иэнин, суола-ииһэ суоҕун учуоттаан, Казанньааҕы бөртөлүөт собуота кэлэн үлэлэһэргэ эмиэ интэриэстээх.
Технопааркалар бииргэ үлэлэһэр былааннаах кэлэллэр. Татаар IT-хампаанньалара аан дойдутааҕы улахан ырыынакка тахсыбыттара, Саха сиригэр эмиэ кэлэн үлэлиир былааннаахтар.
Түүр тыллаах буолан, култуураларбыт майгыннаһар өрүттэрэ элбэх. 4 күн устата олус элбэх тэрээһиннэр буолуохтара. Суруйааччылар бөлөхтөрө сахалыы-татаардыы тылбаастаммыт кинигэлэри сүрэхтиэхтэрэ. Татарстан киинэтин күннэрэ ыытыллыахтара. Елабугатааҕы мусуой-заповедник “В гостях у татар” быыстапкатын аҕалыа. Бу элбэх эрэгийиэннэргэ сылдьыбыт, киэҥ сэҥээриини ылбыт быыстапка буолар.
Биир сүрүн тэрээһин – Суорун Омоллоон аатынан Опера, балет тыйаатырыгар Татарстан ускуустубатын маастардарын кэнсиэрэ буолара саарбаҕа суох. Норуот маастардарын быыстапката бу күн тыйаатыр фойетыгар туруоҕа.
Татарстан дэлэгээссийэтэ Туймаада ыһыаҕар ыалдьыттыаҕа, кыттыыны ылыаҕа, ону тэҥэ, кинилэр национальнай бырааһынньыктара — Сабантуй ыытыллыаҕа. Онно оҥорон таһаарааччылар аҕалбыт табаардарын атыылыахтара, астарын-үөллэрин амсатыахтара. “Чак-чагы” амсайа кэлиэххитин сөп.
«Саха Өрөспүүбүлүкэтэ төрүттэммитэ 100 сылыгар Татарстан күннэрэ ыытыллаллара олус суолталаах уонна үөрүүлээх” диэн Казаньҥа ыытыллыбыт пресс-кэмпириэнсийэ кэмигэр бэлиэтээн эттилэр.
Ангелина Васильева, “Саха сирэ” хаһыат, edersaas.ru
Хаартыска: СИА.