Айар үлэлээх суруналыыс киһиэхэ үлэлиир усулуобуйатын эрэ тэрий — барытын оҥоруоҕа: хаачыстыбалаах бэлэм матырыйаалы ылыаҥ, төрөөбүт дойдуҥ, түөлбэҥ киэҥник сураҕырыа.
Маны өйдүүр салайааччы суруналыыстары кытта ыкса сибээстээхтик үлэлэһэн элбэҕи ситиһэр. Суруналыыска кыра да наада эбээт: үлэлиир остуол, көмпүүтэр, сыыппаралаах сибээс, аһыыр, хонор сир. Бу маннык этэн туран, Туймаада ыһыаҕар суруналыыстарга олус үчүгэй усулуобуйа тэриллибитин бэлиэтиир тоҕоостоох. Көмпүүтэр арааһа, сынньана түһэр дьыбаан (салгынынан үрүллэр эбит), итии чэй, кофе.
Киин куорат пресс- сулууспатын салайааччыта Любовь Сыроватская сурунаалыыстарга хас биирдиибитигэр ким тугу интэриэһиргиирин, ханнык иһитиннэриигэ наадыйарын билсэ сырытта. Ол да иһин буолуо, киирэ-тахса сүүрэ сылдьар суруналыыстар маннык усулуобуйаны тэрийбит кэллиэгэлэрбитигэр махтана эрэ сырыттыбыт. Уопуттаах суруналыыстарга, киин куорат пресс-сулууспатын үлэһиттэригэр бэртээхэй усулуобуйаны тэрийбиттэригэр барҕа махталбытын тиэрдэбит.
Елена ПОТОЦКАЯ, «Саха сирэ» хаһыат.