Интэриэһинэй Култуура

Туймаада ыһыаҕар оҕо киинэтин устуохтара

Бэс ыйын 25-28 күннэригэр Саха сиригэр «Арассыыйа оскуолаларыгар киинэ үөрэҕэ» диэн бүтүн Арассыыйатааҕы үөрэх бырайыагын чэрчитинэн кылгас уус-уран киинэ уһуллуоҕа.

Бэс ыйын 20 күнүгэр Дьокуускайга сүрүн оруолу толорооччулары көрдүүр кастинг буолан ааспыта. «Интелрост» айар дьоҕуру сайыннарар Киин үлэһитэ, бырайыак ааптара, тэрийээччитэ уонна режиссер Елена Дубровская Саха сиригэр уһуллар киинэҕэ аныгы сайдыы уонна үйэлээх үгэстэр айылҕа эйгэтигэр таарыйсыыларын туһунан кэпсиэхтээх.

Бырайыак чэрчитинэн Арассыыйа хас биирдии эрэгийиэнигэр үтүө санаа, кырдьыксыт буолуу, доҕордоһуу өйдөбүллэригэр сыһыаннаах 99 киинэ уһуллуохтаах. Саха сиригэр “Күрбэ” (“Мост”) диэн ааттаах тулуур уонна күүстээх санаа туһунан киинэ уһуллуоҕа.

Артыыс талааннаах оҕолору көрдөөбөппүт. Сүрүн ирдэбилбит — ис киирбэх көрүҥ. 12-14 саастаах оҕолор ортолоругар кыыс уонна уол оҕону булуохпут. Уол аныгы учуонай уобараһын тиэрдиэхтээх, кыыс култуура баайын, өбүгэлэр үгэстэрин өрө тутуу символа буолуохтаах”,  — диир Елена Дубровская.  Киинэ Туймаада ыһыаҕар уонна Хаҥалас улууһугар уһуллуоҕа.

Хаартыска: «Сахалайф»-тан

0
0
Telegram @edersaas20