Батсаап ситиминэн Туймаада ыһыаҕа буолбатын туһунан сурах бүгүн киэһэ күүскэ тарҕанна.
Бүгүн, бэс ыйын 2 күнүгэр, өрөспүүбүлүкэ сүрүн санитарнай бырааһа Маргарита Игнатьева Дьокуускай куорат баһылыгар Евгений Григорьевка Туймаада ыһыаҕын дистанционнай форматынан ыытар туһунан, ону сэргэ Үс Хатыҥ сиригэр-уотугар тэрилтэлэр кэлэктииптэрэ, нэһилиэнньэ олохтоохторо киирэллэрин уонна учаастактары маассабай тэрээһиннэри, бырааһынньыктары тэрийэргэ учаастактары арендаҕа биэриини, эпидемиологическай быһыы-майгы бигэтийиэр диэри бобор туһунан этии киллэрдэ.
Сүрүн санитарнай быраас баһылыкка этиитигэр өрөспүүбүлүкэ үрдүнэн эпидемиологическай быһыы-майгы үчүгэйэ суоҕун бэлиэтиир. 21-с нэдиэлэ түмүгүнэн коронавирус дьаҥынан ыалдьыы 30-49, 50-64 саастаахтарга уонна 65 саастарыттан үөһэ саастаах дьоҥҥо орто көрдөрүүттэн 18%-73% үрдүү турарын чопчулуур. Коронавирус дьаҥынан ыалдьыбыт дьон уопсай ахсааныттан 60%-на киин куорат олохтоохторо ыалдьалларын, онуоха эбии нэһилиэнньэ иммунитетын бөҕөргөтөр быһыыны ылыы Дьокуускай куоракка намыһаҕын тоһоҕолоон этэр.
Төһө даҕаны дьаҥ тарҕаныытын тэтимэ намыраабытын иһин, ааспыт нэдиэлэни кытары тэҥнээтэххэ, ыарыы 18-29 саастаахтарга — 21%, 30-49 саастаахтарга — 13.8%, 65 саастарыттан үөһэлэргэ — 9.6% үрдээбитин бэлиэтиир.
Туймаада ыһыаҕын чуолкайдаары, Дьокуускай куорат дьаһалтатын пресс-сэкирэтээрэ, баһылык көмөлөһөөччүтэ Алексей Толстяковка сибээскэ таҕыстым. Онуоха туһааннаах дьаһал тахса илигинэн сибээстээн, Алексей Толстяков комментарий биэрэртэн тутунна.
Надежда Ильина «Саха сирэ» хаһыат, edersaas.ru