Үгэс курдук, саҥа сыл саҕаланаатын кытта, мэр Айсен Николаев салалталаах Дьокуускай куораппыт дьаһалтата уокуруктар уонна куорат таһынааҕы бөһүөлэктэр хайдах көрүнэн олороллорун, коммунальнай өҥөнү оҥорор сулууспалар үлэлэрин бэрэбиэркэлээтэ. Бу туһунан Дьокуускай куорат дьаһалтатын уопсастыбаннаһы уонна иһитиннэрэр-биллэрэр сириэстибэлэри кытары үлэҕэ Департамена иһитиннэрдэ.
Куорат баһылыга бастаан Автодорожнай, Губинскай, Октябрьскай, Сайсары уонна Киин уокуруктар туруктарын көрдө-иһиттэ. Бэрэбиэркэлээһиҥҥэ куорат баһылыгын хаһаайыстыбаннай боппуруостарга бастакы солбуйааччы Дмитрий Садовников, уокуруктар управлениеларын уонна коммунальнай тэрилтэлэрин салайааччылара кытыннылар.
Бөҕү-саҕы тиэйии-таһыы үлэтэ кэмигэр ыытыллар дуу, суох дуу диэн бастатан туран Ленин, Дзержинскэй, Богатырев, Хабаров, Губин, Чернышевскай, Дежнев, Автодорожнай, о.д.а., уопсайа 25 уулуссаны бэрэбиэркэлээтилэр. Салгыы элбэх кыбартыылараах уонна чааһынай дьиэлэр тастарын, хаар ыраастаныытын, хаарбах туруктаах дьиэлэр көтүрүллүүлэрин, о.д.а. болҕомтолорун уурдулар.
Айсен Николаев коммунальнай өҥөнү оҥорор сулууспалар, управляющай компаниялар үлэлэрин Саҥа дьыллааҕы бырааһынньык кэнниттэн тута саҕалаабыттар диэн эттэ. Өрө тардыныы үлэтэ харахха тута быраҕылларын ыйда.
«Бырааһынньык дирбиэнин, үүрээнин-аараанын кэнниттэн куораппыт сүрдээҕин ыраас турар. Бу ыраастааһын, бэрээдэктээһин үлэтэ тута саҕаламмытын көрдөрөр. Урукку сылларга баччаларынан 3 тыһ.куб.м.бөх-сах ыраастанан тиэллэр буоллаҕына, быйыл 5 тыс. куб.м. бөх-сах тиэллибит. Ити күүстээх үлэ ыытылларын мэктиэлиир. Манна даҕатан эттэххэ, суол сулууспалара, «Якутдорстрой» АУо биригээдэлэрэ куорат уулуссаларыттан хаары ыраастааһыннарын күргүөмнээхтик саҕалаатылар. Аны билигин күн-дьыл сылыйда. Сибиэһэй салгынынан тыына, күүлэйдии тахсааччы биллэ элбээтэ. Онон дьон астына, дуоһуйа, бу мин куоратым диэн киэн тутта сынньанарыгар усулуобуйа баар буоларын курдук үлэ салҕаныахтаах», — диэтэ А.С.Николаев. Бэрэбиэркэлээһин үлэтэ салҕанарын иһитиннэрдэ. Онон Туймаадабыт туонатыгар хайдах көрүнэн-истинэн олорорбутун өссө да истэ-билэ олоруохпут.
Санатан эттэххэ, куорат дьаһалтата сыл ахсын маннык бэрэбиэркэни оҥороро өрө тардыныы үлэтэ күүһүрэригэр тирэх буолла.