Туймаада туонатын аҕам саастаахтара бастыҥ тиэргэн иһин күрэстэстилэр

Дьокуускай куоракка аҕам саастаахтарга анаан Губинскай уокурук «Бэтэрээннэр тиэргэннэрэ-2017» куонкурус ыытта. Бу туһунан уокуруктан иһитиннэрдилэр.

П.И. Дудкин аатынан сибээс уонна энергетика кэллиэһигэр үгэс буолбут «Бэтэрээн тиэргэнэ-2017»  куонкурус өрүү буоларын курдук өрө көтөҕүллүүлээхтик ыытылынна.  Тэрээһиҥҥэ Дьокуускай куорат уонна куорат таһынааҕы бөһүөлэктэр бэтэрээннэрин түмсүүлэрэ кытыннылар.

Түһүлгэҕэ түмсүбүт ытык дьону куорат баһылыга Айсен Николаев, нэһилиэнньэ социальнай көмүскэллээх буолуутун Управлениетын салайар Семен Матвеев, СӨ бэтэрээннэрин түмсүүтүн бэрэссэдээтэлэ Будимир Слепцов, Аҕа дойду улуу сэриитин бэтэрээнэ Михаил Попов эҕэрдэлээтилэр.

Куонкурус икки түһүмэхтээх буолан, кыттыбыт дьоҥҥо улахан долгутуулаах буолан биэрдэ. Ол курдук, куонкурустаһааччылар даачаларын сирин-уотун, сибэккилэрин, оҕуруоттарын аһын харахха быраҕыллар гына араастаан киэргэтэн түһэрбит хаартыскаларын хамыыһыйаҕа туттардылар. Түмүккэ «Бастыҥ оҕуруотчут», «Сибэккини бастыҥ олордооччу», «Бастыҥ оҥоһуулаах даача» номинацияларынан кыайыылаахтар ааттаннылар.

Иккиһинэн, бэтэрээннэр оҕуруоттарын аһынан остуолларын киэргэтэн баран презентациялаатылар. Бииртэн биир киһини эрэ манньытар сиэдэрэй оҥоһуулаах, киэргэллээх тиэргэн элбэҕэ дьүүллүүр сүбэни улахан толкуйга түһэрэ сырытта. Уопсай түмүккэ, Дьокуускай куорат уокуруктарын ортотугар саамай элбэх очукуону ылбыт Губинскай уокурук  бэтэрээннэрин түмсүүтэ бастаата, куорат таһынааҕыларга Пригороднай с. кыайыылаах буолла.