![](https://edersaas.ru/wp-content/uploads/2021/06/vikt-osnovnoj.jpg)
Арассыыйатааҕы футбол сойууһа 2019 сылтан «Эдэр ыччат футболун лигата» бырайыагы саҕалаабыта. Бу бырайыагы быйылгыттан Уһук Илин эрэгийиэнигэр киллэрдэ. Бу лигаҕа Саха сириттэн «Арктика» сүүмэрдэммит футбол хамаандата кыттыыны ылар.
Ыам ыйын 29 күнүттэн Уһук Илиҥҥэ аан бастакытын Ыччат футболун лигата сүрэхтэннэ. Лигаҕа барыта Уһук Илин араас куораттарыттан 10 оскуола кыттыыны ылар: «СК-Хабаровск» (Хабаровскай), «Олимпийскай резервэлэр кыраайдааҕы спортивнай оскуолалара» (Владивосток), 3 №- дээх Оҕо ыччат спордун оскуолата (Благовещенскай), 2 №-дээх «Олимпийскай резервэлэр спортивнай оскуолалара» (Комсомолск-на-Амуре), «Океан» спортивнай оскуола (Находка), «Сахалин» спортивнай оскуола (Южно-Сахалинскай), «Футбол республикатааҕы анал спортивнай оскуолата» (Дьокуускай), Футбол спортивнай оскуолата (Петропавловскайдааҕы-Камчатка), «Белогорец» спорт оскуолата (Белогорскай).
Кыайыылаахтар Арассыыйаҕа бастыыр иһин финалга тахсыахтара уонна Уһук Илиҥҥэ кыайыылаах аатын сүгүөхтэрэ. Лига ыам ыйыттан алтынньыга диэри ыытыллар.
Ааспыт өрөбүлгэ Н.Н.Тарскай аатынан «Туймаада» стадионугар өтөрүнэн буолбатах футболга күрэхтэһии буолан ааста. Лигаҕа Белогорскай куораттан «Белогорец» футбол оскуолатын хамаандата Саха сиригэр ыалдьыттаата.
Саха сириттэн «Туймаада» стадион хонуутугар «Футбол республикатааҕы анал спортивнай оскуолата» ыалдьыттары кытары күөн көрүстэ. Уолаттар ардах курулаччы түһэ турдаҕына оонньоотулар.
Бастакы тайм 5-с мүнүүтэтигэр олохтоох хамаанда кыттааччыта Арсен Лыткин бастакы голу, «Арктика» хамандыыра Никита Угай бастакы тайм ортотугар иккис голу киллэрэн балаһыанньаны биллэ тупсардылар. Түмүккэ оонньуу 2:0 «Арктика» хамаандатын туһатыгар буолла, эдэр футболистар үөрүүлэрэ муҥура суох.
Прокопий Владимирович Федоров — «Футбол республикатааҕы анал спортивнай оскуолатын» сүрүн тириэньэрэ:
— «Футбол республикатааҕы анал спортивнай оскуолатын» сүүмэрдэммит хамаандатыгар «Виктория» футбол кулуубуттан 18 оҕо, 4 нүөмэрдээх оҕо спортивнай оскуолатыттан -4, «Динамо» кулууптан — 2, Томмоттон — 1, Мэҥэ Хаҥаластан -2 оонньооччу киирдилэр. Уһук Илиҥҥэ Саха сирин аатыттан сүүмэрдэммит хамаандабыт «Арктика» диэн аатынан кыттар.
Былырыын СӨ Ил Дархана Айсен Сергеевич Николаев, Саха сиринээҕи Футбол сойууһун бэрэсидьиэнэ Владимир Викторович Кожевников, Футбол сойууһун вице-бэрэсидьиэнэ Михаил Джафарович Гасанбалаев өрөспүүбүлүкэҕэ футбол көрүҥүн сайыннарар туһугар, Россия футболун сойууһун кытары бииргэ үлэлэһэр туһунан сөбүлэһии олохтообуттара. Ол сөбүлэһии түмүгэр Саха сирин футболист оҕолоро улахан таһымнаах күрэхтэһиигэ кыттан эрэллэр.
Төһө даҕаны күүстээх ардахтаах күн-дьыл турдар, күрэхтэһии үрдүк таһымнаахтык ааста. «Триколор» платформа оонньууну быһа эпииринэн көрөөччү киэҥ эйгэтигэр таһаарда. Ону тэҥэ улахан судьуйалар кытыннылар.
Бэс ыйын 6 күнүгэр Камчаткаҕа баран оонньуубут. Урут Камчатка хамаандатын кытта Уһук Илиҥҥи Чөл олох финалыгар мини-футболга оонньоон 4:2 ахсаанынан кыайан турабыт. Бэс ыйын 12 күнүгэр Комсомольск-на-Амуре куоракка күрэхтэһэ барыахтаахпыт. Оҕолор бэрткэ оонньоотулар», — диэн кыайыылаах «Арктика» футбол хамаандатын дьарыктыыр футбол анал спортивнай оскуолатын сүрүн тириэньэрэ тус санаатын үллэһиннэ.
—Алексей Захаров, «Арктика» футбол хамаандатын саба түһээччитэ, «Футбол республикатааҕы анал спортивнай оскуолатын» Мэҥэ Хаҥаластааҕы филиалын иитиллээччитэ:
— Муус устарга сүүмэрдээһиҥҥэ талыллан «Арктика» хамаандатыгар киирбитим. Бэйэм Мэҥэ Хаҥалас Табаҕатыттан төрүттээхпин, билигин Лоомтука оскуолатыгар үөрэнэбин, футболга дьарыктанабын. Футболга маҥнайгы кылаастан оонньуубун. Үчүгэйдик оонньоотубут, күрэхтэһии профессиональнай таһымҥа ааста. Профессиональнай оонньуу олбуор футболуттан олох атын.
Саха сирин футболистарыгар өрөспүүбүлүкэ чиэһин ситиһиилээхтик көмүскээн, кыайыы-хотуу аргыстаналларыгар баҕарабыт!
Надежда Ильина, edersaas.ru