Улуу Кыайыы күнүн көрсө киин куоракка “Туймаада саллаата” мемориалга «Хорсун быһыы» уруога буолла. Ил Түмэн дьокутааттара, бырабыыталыстыба чилиэннэрэ, Докуускай куорат салалтата саха бэргэн ытааччыларын уобараһа буолбут снайпер памятнигар сибэкки дьөрбөтүн уурдулар, тэрээһиҥҥэ кытыннылар.
Кыргыһыы толоонугар сырдык тыыннарын толук уурбут буойуннарга сүгүрүйэн иһийии кэнниттэн, СӨ Ил Түмэнин бэрэссэдээтэлин солбуйааччы Виктор Губарев тыл эттэ.
«Уоттаах сэриини дьиҥнээх патриоттары иитэн таһаарбыт Учуутал кыайбыта. Ол да иһин ыччат илиитигэр саа-саадах тутан, Аҕа дойдутун өстөөхтөн көмүскээри биир киһи курдук туруммута. Эдэр дьон чахчы дьоруойдуу, хорсун-хоодуот быһыыны фроҥҥа көрдөрбүтэ», — диэтэ кини.
Саха сэрииһитин кыайыыга кылаатын Федор Поповунан сирэйдээн холобурдаата. Дьон-сэргэ итини хаһан да умнубатын тоһоҕолоото. Ол курдук былырыын ахсынньыга Ил Түмэн делегацията сахалартан бастакы Сэбиэскэй Сойуус Дьоруойа көмүллэ сытар Белоруссия Лоевскай оройуонугар тиийэн, миитиҥҥэ кыттыбытын санатта. Виктор Губарев салгыы билиҥҥи үйэҕэ фашизм эмиэ төбөтүн хат көтөхпүтүн, эдэр буойуннарбыт Донбасска көҥүлү көмүскүүллэрин бэлиэтээтэ.
Бырабыыталыстыба Бэрэссэдээтэлин солбуйааччы Ольга Балабкина сэрии сылларын ыарахаттарын барытын тулуйан, Кыайыыны уһансыбыт аҕа көлүөнэҕэ ис сүрэҕиттэн махтанна. Аҕам саастаах дьоҥҥо доруобуйаны, хамсыгы этэҥҥэ туоруулларыгар баҕарда.
«Кэннибитэн кэхтибэккэ, иннибит диэки баран иһиэхтээхпит. Бүгүн аҕаларбыт, эһээлэрбит хорсун быһыыларынан киэн туттан, махтанан туран, анал байыаннай эпэрээсийэҕэ кытта сылдьар уолаттарбытыгар эмиэ ыалдьабыт», — диэтэ вице-премьер.
Дьокуускай куорат аҕа баһылыга Евгений Григорьев уоттаах сэрии хас биирдии саха ыалыгар ыар сүтүк аҕалбытын санатта. Кини этэринэн, билигин төрдүс көлүөнэ ыччат эһээлэрбитигэр махтана үүнэр-сайдар. «Быйыл Саха АССР 100 сыллаах өрөгөйдөөх үбүлүөйүн бэлиэтээтибит. Аҕа көлүөнэбит сэриигэ, тыылга хорсун быһыытын көрдөрбөтөҕө эбитэ буоллар, ити бырааһынньык суох буолуо этэ. Кинилэр бэйэлэрин сырдык тыыннарын толук ууран, биһиги эйэлээх халлаан анныгар көҥүл олохпутун уһансыбыттара», — диэтэ кини.
Сайсарытааҕы уокурук бэтэрээннэрин салайааччыта, Ис дьыала министиэристибэтин полковнига Николай Егоров бэтэрээннэргэ эмиэ эҕэрдэ тылын тиэртэ. Онтон 10-с нүөмэрдээх орто оскуола иккис кылааһын үөрэнээччитэ Валерия Корощенко «Девочка Россия» диэн ырыатынан бар дьон санаатын көнньүөртэ.
Мустубут ыччакка анаан, история учуутала Артур Моисеев уруок ыытта. Кини 2014 сыллаахха Саха сирин бастыҥ учуутала үрдүк аатын ылбыта. 2015 сыллаахха Бүтүн Арассыыйатаҕы «Сыл учуутала» куонкурус тиһэх түһүмэҕэр кыттыбыта.
Чокуур Гаврильев, «Саха сирэ» хаһыат
Мария Васильева, Ариан Иванов хаартыскаҕа түһэриилэрэ