Норуоттар икки ардыларынааҕы “Туймаада” олимпиада бастакытын онлайн-эрэсииминэн барыаҕа
Саха сирэ оскуола үөрэнээччилэригэр анаан ыытар норуоттар икки ардыларынааҕы “Туймаада” олимпиада быйыл 27-с төгүлүн буолар. Олимпиада урукку сыллартан уратыта диэн, хамсык хааччахтааһынынан сибээстээн, онлайн-эрэсииминэн ыытыллыаҕа.
Өскөтүн, урукку сылларга математика, физика, химия уонна информатика биридимиэттэригэр күрэхтэһэр эбит буоллахтарына, быйыл математикаҕа эрэ буолуо диэн тэрийээччилэр этэллэр. Бу бастатан туран, олимпиаданы ыраахтан олорон ыытыыны кытта сибээстээх диэн быһаараллар.
Олимпиада онлайнынан барар буолан, аан дойдуга киэҥник тарҕаммыт прокторинг систиэмэнэн кэтээн көрүөхтэрэ. Кыттааччыны видеонан, аудионан көрөн олоруохтара.
Сыллата кэлэр Арассыыйа, Казахстан, Румыния, Болгария, Таджикистан, Иран, уо.д.а. дойдулар үөрэнээччилэрэ кытталлара сабаҕаланарын этэллэр. “Арассыыйа аатын көмүскүүргэ Саха сириттэн 40-ча бастыҥ оҕо сүүмэрдэммитэ. Билигин олимпиадаҕа бэлэмнэнэ таарыйа үөрэтэр-эрчиллэр түмсүүнү ааһаллар. Кинилэри кытта өрөспүүбүлүкэ бастыҥ педагогтара, ону тэҥэ, ыҥырыллыбыт дьон — норуоттар икки ардыларынааҕы олимпиада кыайыылаахтара, тренердэрэ үлэлэһэллэр. Оҕолор түмсүүнү ситиһиилээхтик ааһан, улахан аҥаардара олимпиадаҕа киирэллэригэр эрэнэбит”, — диэн НКИХ быһа сибээһинэн тахсыбыт быйылгы “Туймаада” олимпиада дьүүллүүр сүбэтин бэрэссэдээтэлэ Евгений Шарин иһитиннэрдэ.
Олимпиада сорудаҕын оҥорууга туспа бөлөх үлэлиир. Садаачалары нуучча уонна англия тылынан бэлэмнээбиттэр, олус интэриэһинэйдэр диэн этэллэр. Санатан эттэххэ, быйылгы “Туймаада” олимпиада балаҕан ыйын 30 – алтынньы 6 күннэригэр буолуоҕа. Бу сыллар тухары Арассыыйаттан уонна тас дойдулартан, уопсайа, 3200 үөрэнээччи кыттыбыта.
Людмила ПОПОВА, “Саха сирэ” хаһыат, edersaas.ru