“Туймаада” норуоттар икки ардыларынааҕы олимпиада түмүгэ таҕыста

Ааптар: 
Бөлөххө киир:

Тас дойдуларга тиийэ аатырбыт норуоттар икки ардыларынааҕы “Туймаада” олимпиада быйыл Интеллектуальнай оонньуулар иитинэн ыытылынна. Олимпиада түмүгэ таҕыста. Кыайыылаахтары наҕараадалаатылар.

edersaas.ru

Түмүккэ муҥутуур кыайыылаахтарынан информатикаҕа Артур Кутузов (Ураллааҕы федеральнай университет анал үөрэтэр-научнай киинэ), математикаҕа улахаттарга Тамерлан Бурамбаев (Казахстан), кыраларга Владимир Роговскай (Казахстан), физикаҕа улахаттарга Даир Нуртаев (Казахстан), Разан Чиву (Румыния), химияҕа улахаттарга Chan Chee Yong Leemen (Сингапур), кыраларга Шингис Токанов (Казахстан)

Математикаҕа эспиэртэр хамыыһыйаларын чилиэнэ, өрөспүүбүлүкэтээҕи лиссиэй-интэринээт математикаҕа учуутала Эрчимэн Избеков:

— Быйыл балачча уһун бэрэбиэркэ ааста, от ыйын 3-7 күннэригэр буолла. Норуоттар икки ардыларынааҕы таһымнаах буолан, англия уонна нуучча тылларынан ыытыллар. Ол эрээри, фарси, казах тылынан суруллубут үлэлэр эмиэ бааллар. Олору тылбаастыыр ирдэнэр.

Олимпиада кыттыылаахтарын илэ кэриэтэ көрбөтүбүт. Олоҕурбут көрүҥүнэн Саха сирин уонна дойду сорох эрэгийиэннэрин оҕолоро кытыннылар, тас дойдулар – тэйиччиттэн.

Чахчы күүстээх оҕолор көстөн ааһаллар. Улахаттарга Казахстан сүүмэрдэммит хамаандатын бэрэстэбиитэлэ, сотору кэминэн математикаҕа норуоттар икки ардыларынааҕы олимпиадаҕа кыттыахтаах оҕо баар. “Туймаадаҕа” ол курдук күүстээх оҕолор кытталлар.

Математикаҕа сүрүн сорудахтары Бүтүн Арассыыйатааҕы үөрэнээччилэр олимпиадаларын методическай хамыыһыйатыгар киирэр дьон А.С. Голованов, К.П. Кохась оҥордулар. Сорудахтар уустуктар, улахан тыҥааһыннаах олимпиада ааста. Уопсайа, икки лиганан 116 үлэни бэрэбиэркэлээтибит.

Саха сириттэн улахан лигаҕа Ян Власов үрүҥ көмүс, быйыл математикатын 100 баалга туттарбыт Наталья Васильева боруонса призер буоллулар. Аллараа лигаҕа Давид Николаев боруонсаны ылла. Быйыл Саха сириттэн үс оҕо призердаабытынан сыаналаатахха, урукку сыллартан хаалыы суох, үчүгэйдик кытыннылар.

Евгения Степанова, төрөппүт:

— В.П. Ларионов аатынан физика-тиэхиньиическэй лиссиэй 8-с кылааһын бүтэрбит Кирилл Степанов ийэтэбин. Кирилл “Туймаада” олимпиадаҕа химия биридимиэтигэр кыттан “Олимпийскай эрэл” номинацияны ылла. Химиянан 8-с кылаастан сэҥээрэн дьарыктанан эрэр. Бу иннинэ химия олимпиадатын муниципальнай түһүмэҕэр бастаабыта. Учуутала – Екатерина Дмитриевна Широких. Оҕобут номинацияҕа тиксибититтэн олус үөрдүбүт, — диэн санаатын үллэстэр. Итиэннэ оонньуу кэмигэр Кирилл  көхтөммүтүн, тустаах биридимиэккэ улахан интэриэс үөскээбитин ыйар.

Өрөспүүбүлүкэтээҕи лиссиэй-интэринээт 9-с кылааһын бүтэрбит Давид Николаев:

— Кыралар лигаларыгар математика олимпиадатыгар кыттан 3-с истиэпэннээх диплому ыллым. Олимпиада садаачалара ыарахаттар, кыттар оҕолор таһымнара олус үрдүк. Бу олимпиадаҕа үсүһүн кыттабын. Ааспыт сыллардааҕар быдан үчүгэйдик ааста. Арктика оскуолатыгар ыытыллыбыта бэрт, наһаа үчүгэй оскуола эбит. Элбэх сиртэн оҕолор кэлбиттэр, — диэн кэпсиир.

Казаннааҕы федеральнай университет анал үөрэтэр-научнай киинин үөрэнээччитэ Таисия Лукаш (Татарстан):

— Бу олимпиадаҕа кыттыбыппыттан олус үөрдүм. Тоҕо диэтэххэ, бу олимпиада чахчы оһуобай, норуоттар икки ардыларынааҕы таһымнаах. Дьиэбиттэн бачча ыраах өссө сылдьа, көтө иликпин.  Саха сирин дьонун саҥа көрдүм, ураты үгэстээх эбиккит.

Тус бэйэм олимпиада иккис түһүмэҕин сэҥээрдим. Эспэримиэнниир сорудахтара суругунан этилэр уонна уустуктар этэ, онон ордук өйдөнөн хаалыа дии саныыбын. Олимпиада тэрийээччилэригэр улахан махтал.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0