Үс Хатыҥ маанылаах сиригэр сарсыарда эрдэттэн дьон тоҕуоруһа муһунна. Сылга биирдэ буолар сүрүн алгыстан күүс-уох эбинээри сүрүн түһүлгэ диэки хаамсар. Олохторун булан олороотторун кытта ”дьээһиэ-буоһуо”диэн кылыһахтаах куолас ыраахтан дьирэһийэн, сыыйа улаатан иһиллэр.
Edersaas.ru
Быйылгы ыһыах ыалдьыттарынан СӨ Ил Дарханын эбээһинэһин быстах кэмҥэ толорооччу Айсен Николаев, АЛРОСА генеральнай дириэктэрэ Сергей Иванов, Ил Түмэн Судаарыстыбаннай мунньах бэрэссэдээтэлэ Александр Жирков, Арассыыйа-Япония “Дискуссионнай кулууп” сүбэһиттэрин палаататын бэрэссэдээтэлэ, Япония Арассыыйаны кытта экэнэмиичэскэй бииргэ үлэлэһиигэ дьыалаларын миниистирэ Хиросигэ Сэко, о.д.а. кытыннылар. Өрөспүүбүлүкэ салалтата, ыҥырыылаах ыалдьыттар олохторун булан олороотторун кытта тоҕус аттаах сылгыһыттар түһүлгэни тула хаамтаран ааһаллар. Кыталыктар киирэн түһүлгэни арчылаан тахсаллар. Дьэ, саха дьоно ыһыаҕы манна ыһыан сөп эбит диэбиттии көрөн-истэн тахсаллар, тута тэлиэгэлээх атынан саха ыала барахсан оҕотун-уруутун олордубутунан ыһыахтыы барар. Кинилэр кэннилэриттэн оҕустарынан сиэппитинэн дьон-сэргэ ыһыахха аттанар. Диктор аал уоту оттуоҕуҥ диэн этээтин кытта, торҕо буруо унаарыйар. Аар Айыы маанылаах иччилэригэр, Аан Алахчын Хотуҥҥа анаан салама ыйыыллар. Салгыы түһүлгэҕэ үс алгысчыт киирэр, лыык курдук мустубут саха дьоно чуумпуран олорон алгыска тиксээри тылларын болҕойон истэллэр. Бары биир киһи курдук, биир сомоҕо буолан, сүһүөхтэригэр туран, Үрдүк Айыыларга сүгүрүйэллэрин биллэрэн, илиилэрин өрө уунан бэлэмнэрин көрдөрөллөр. Алгысчыт Айыылартан көрдөһөр тылын этэр. Дьэ, ити курдук кымыс иһилиннэ, Ыһыах аһылынна. СӨ Ил Дарханын эбээһинэһин быстах кэмҥэ толорооччу Айсен Николаев: “Самаан сайын кэлэн, Сахабыт сиригэр, Туймаада хочотугар Үрүҥ Тунах ыһыаҕы ыһыллыбытынан, аһыллыбытынан итиитик-истиҥник эҕэрдэлиибин. Алта сыл тухары бу Ытык Үс Хатыҥ сиригэр, куорат аҕа баһылыга буоламмын ыһыаҕы саҕалаабыттаахпын. Ити алта сыл устата куорат сайдыытыгар, үлэбэр куруук аттыбар эһиги баар этигит, Дьокуускай куорат олохтоохторо. Үлэбит түмүгэр куораппыт сайынна, Арассыыйа инники күөҥҥэ таҕыста. Куруутун өйөбүлгүт иһин махтанабын. Инникитин Саха сирэ сайдарын туһугар үлэбэр, баайдык, дьоллоохтук олорорун туһугар күүс-көмө буолуоххут диэн эрэнэбин”, — диэн этээтин кытта, уруйдуур ытыс тыаһа ньиргийэр. Айсен Сергеевич бары бииргэ түмсэн дьон-сэргэ уйгулаах, дьоллоох олохтоох Саха сирин Арассыыйа бастыҥ эрэгийиэнэ оҥоруохпут диэн тоһоҕолоон эттэ. Өрөспүүбүлүкэ олохтоохторугар дьолу-соргуну, ситиһиини баҕарда. Ыһыах сүрүн сиэрэ-туома түмүктэнэр. Түһүлгэҕэ оһуохай саҕаланар. Дьон күн эргиирин батыһа тоҥолохторуттан ылсан оһуохайга киирэллэр. Саха дьонугар Уруй! Айхал!
Людмила ПОПОВА, “Саха сирэ” хаһыат, edersaas.ru